Djadumingu 25 di ougùstùs Randal Corsen i Dibo D lo uni forsa un bia mas pa presentá na Landhuis Brakkeput Meimei otro evento spesial ku müzik di alto kalidat: Antillean Jazz Evening. Durante e evento aki lo estrená dos proyekto ku jazz lokal di Randal Corsen: su trio ku su músikonan di promé ora Eric Calmes i Pernell Saturnino, i e duo di piano-vokal ku Dibo D. E evento aki lo kumisa 7or di anochi pa habri e siman di Curaçao North Sea Jazz Festival (CNSJF). 

Ultimo añanan e pianista, kompositor i areglista Randal Corsen huntu ku e kantante, outor di letra i kompositor Dibo D a hinka diferente proyekto den otro. E último tabata nan konsierto ‘Mama Pa Semper’. Kada un tabata eksitoso, esun mas ku e otro.

Ku Antillean Jazz Evening nan ke trese un anochi spesial pa tur e amantenan di jazz lokal, i pa e hendenan ku ke sinta trankil disfrutá di un konsierto ku músika aventuroso den un ambiente íntimo. E anochi lo konsisti di dos parti. Den e prome parti tin presentashon di Randal Corsen trio ku Pernell Saturnino i Eric Calmes. E trio aki ta konsisti di algun di e mihó músikonan di jazz di nos isla; no ta pòrnada ku dos di nan ganador di e prestigioso premio Colá Debrot. E trio tabatin vários presentashon eksitoso den eksterior (Aruba, Colombia, Hulanda), tambe presentando nan meskla típiko di jazz ku müzik di Kòrsou. 

E di dos parti lo konta ku presentashon di Randal Corsen & Dibo D ‘duets’. Siendo un reto relativamente nobo p’e, ya Dibo a demostrá kon el a krese den e formashon di duo aki. E grabashon di e vershon remarkabel di su tumba ganado ‘Kòrsou Ta Den Su Gloria’ den un vershon duo huntu ku Randal, ku un toke di jazz, ta otro prueba di esaki. Pero e públiko por konta ku Dibo lo join Randal Corsen trio den e promé parti tambe, pero meskos tambe Pernell i Eric tambe lo join e duo di Dibo i Randal pa klousurá e anochi. Karchinan pa Antillean Jazz Evening ta kosta Naf 45,- i ta optenibel na Mensing’s Caminada i na Van den Tweel Zeelandia.

A skohe pa tene e evento na Landhuis Brakkeput Mei Mei, ya ku den pasado vários musiko di jazz a presentá aya. Den temporadanan anterior di CNSJF a yega di presentá vários pre-show einan, manera e konsierto di Al Jarreau, José James i Richard Bona. Ademas, e setting di Brakkeput Meimei ta hasi e sitio apropia pa e Antillean Jazz Evening, kaminda e múzik lo ta sentral. Despues di e Antillean Jazz Evening Randal, Dibo, Eric i Pernell ta bai prepará pa presentá na Aruba durante e Casibari Jazz Festival ku lo tuma lugá dia 20 i 21 di sèptèmber.