Djadomingu 31 di mart na Avila Beach Hotel

WILLEMSTAD – Ultimo añanan pianista, kompositor i areglista Randal Corsen i e kantante, outor di letra i kompositor Gilbert ‘Dibo D’ Doran huntu a hinka diferente proyekto den otro. Kada un tabata eksitoso, esun mas ku e otro. Dibo su koronashon komo Rei di Tumba 2019 ta e ehèmpel mas resien di esei. Awor nan a bini ku e idea pa forma ‘Duets’, un presentashon pa awor aki pa un solo biaha riba djadomingu 31 di mart den e ambiente di La Belle Alliance di Avila Beach Hotel.

Den pasado Randal Corsen a yega di forma un duèt ku kantante Izaline Calister i tambe ku guitarista Jean Jacques Rojer. Den ámbos kaso tabata trata di konsiertonan na Hulanda. Un duèt ta un forma poko oudas, pero tambe hopi íntimo di dos músiko ku ta drenta un diálogo musikal, loke ta hopi aventuroso i tambe dinámiko. Duèt ta para tambe pa e piesanan ku nan dos huntu lo presentá kuné. Unabes ku Dibo a demostrá kon e por anda bon ku reto nobo riba su kaminda, lo e proba un biaha mas ku esaki tambe e por.

Piano di kola

Ta importante menshoná ku e sitio na Avila ta duna Randal Corsen e oportunidat pa toka riba e ‘Rolls Royce’ entre e pianonan, esta e piano di kola marka Bösendorfer di Avila Beach Hotel. Tambe ta asina ku e públiko ta sinta hopi serka di e tarima di moda ku nan no tin nodi pèrdè nada di loke e dúo ta bai presentá. E pianista i e kantante den e formashon nobo aki lo presentá bastante piesa lokal konosí, manera ‘Abo so’ i ‘Dugudugu sin sous’, pero tambe nan hit resien ‘Dushi Sintimentu’. Ta bai dje leu ei ku nan no ta basilá pa interpretá e tumba ganador ‘Kòrsou ta den su gloria’ den e formashon aki.

Benta di karchi

Djadomingu 31 di mart e konsierto ta kuminsá 7 or di anochi, djis despues ku solo baha. Karchi na rason di 45 florin pa persona ta optenibel na Mensing’s Caminada i na resepshon di Avila Beach Hotel. E sala tin un kapasidat limitá pa loke ta stul; pues, no por bende mas karchi ku esei. Ku otro palabra, esun ku bini promé ta bebe awa limpi.