Kantante Izaline Calister komo wéspet spesial

WILLEMSTAD – Despues di e tremendo éksito di e konsiertonan di Pasku di e último añanan, Randal Corsen & Friends ta preparando pa sigui riba e rumbo, pero awor den e ambiente di kambio di aña: ‘Paranda di Fin di Aña’. Aparte di músika di La Sonora Matancera e programa lo inkluí músika tradishonal djaki mes i for di region di Karibe pa e temporada aki di aña. Lo bira un anochi yen di músika adekuá ku un toke di nostalgia. Banda di e kantantenan fiho Yumarya Grijt, Ñaño Rosario i Richie Rich Pieter tin tambe Izaline Calister komo kantante invitá.

E aña aki a want’é na un konsierto so: djaweps 29 di desèmber 2016 na Landhuis Brakkeput Mei Mei. Pa karchi di entrada (na rason di 75 florin) por akudí na e ofisina di Fun Miles, Mensing’s Caminada i Van Tweel na Zeelandia i Jan Thiel.

Kantantenan

E pianista Randal Corsen gusta di ta rondoná pa e mihó músikonan. E biaha aki e banda ku ta kompañ’é ta konsistí di 12 persona ku un núkleo mas òf ménos fiho. Asina e tin e parti instrumental bon kubrí.

Awor ku e kantante Yumarya Grijt a bin biba aki bèk, tabata ñaña pa hink’é di nobo den e programa. Fiho tambe ta e konosido tremendo kantante Orlando ‘Ñaño’ Rosario. Aña pasá e popular kantante Heinrich ‘Richie Rich’ Pieter a debutá den e konstelashon aki i awor e ta aden atrobe.

Pa e konsierto aki di fin di aña a agregá na e trio aki un wéspet spesial, esta Izaline Calister ku no mester di mas introdukshon. E ta na kas aki. E lo interpretá piesa di su disko spesífiko pa e temporada aki di aña, pero tambe di su último disko, i por spera tambe algun di su hitnan grandi di mas aña bèk ku ta tan gustá ainda.

Músika tradishonal

E programa di e anochi aki ta kargá ku músika ku tradishonalmente hende sa skucha den e periodo aki di aña ku ta enserá tambe algun piesa di isla i pais den área di Karibe. Te resien músikonan lokal tabatin e kustumber den e temporada aki pa saka piesa nobo. No semper nan tabatin di aber ku kambio di aña, pero ketu bai na hopi okashon ta tende nan den e temporada aki. Resumiendo, esaki ta primintí atrobe di bira un anochi dibertido ku músiko i kantantenan ku sa ku lo sa kon presentá lo mihó na un públiko buenagradesidu.