Djabièrnè 19 di desèmber 2014, e hóben kantante yu di Kòrsou Qushánnick Thodé, mihó konosí komo Qshansz orguyo di Miembro di Parlamento Amerigó Thodé di MFK a firma su di dos kontrakt ku Stage Entertainment na Alemania. Despues di algun oudishon intensivo atrobe Qshansz a wòrdu skohe pa forma parti e biaha aki di e musical “Mamma Mia” kual ta basa riba e hitnan di e agrupashon popular ABBA. “Mamma Mia” lo kuminsá ku training for di yanüari 2015, 5 di mart lo e habri ofisial na Metronom Theater na Oberhausen i ta plania pa keda te ku òktober einan. Despues ku Qshansz a terminá su estudio di ekonomia na Erasmus Universiteit i tambe un aña despues su skol di teater, Qshansz a firma su promé kontrakt ku Stage Entertainment pa di e forma ei ya kaba pa mas ku un aña e bai aktua i forma parti di un musical Sister Act na Alemania na Oberhausen. Awor ku e musical aki ta terminando Stage Entertainment tabata ke a sigui hasi uso di e trabounan ku Qshansz a bini ta desplegando último tempu serka e empresa aki, esaki a bin redondá den un otro kontrakt nobo ku e titulo di Mamma Mia por sierto e di dos kontrakt pa e talentoso yu di Kòrsou Qshansz Thodé. Aki nos ta mira kon un hóben yu di Kòrsou ta avansando i mustrando e mundu eifó ku nos talentonan hóben no ta baha kabes internashonalmente pa ningun hende i ku nan ta sigui destaká i no solamente halsa nan nòmber so den showbiz pero tambe nòmber di nan pais Kòrsou. Un pabien na Qshansz, su rumannan i mayornan ku mester ta hopi orguyoso di nan yu  i nos ta spera ku e sigui den e kaminda positivo aki i sigui di ta un ehèmpel pa nos hóbennan i mustra ku nos yu di tera tambe por destaká i bira grandi internashonalmente aunke kon chikitu ku nos pais Kòrsou ta den e mundu eifó. Qshansz lo ta na Kòrsou dia 23 di desèmber kaminda e lo duna algun presentashon ku Cache  i tambe pasa dianan di fiesta huntu ku su mayornan pa den kuminsamentu di aña e bai bek pa di e forma ei e sigui i kumpli ku su kompromisonan ku ta wardele aya na Oberhausen Alemania. HOPI EKSITO NOS TA DESEA QSHANSZ I SIGUI TRAHA DURU MANERA SEMPER BO A HASI PASO TRABOU DURU SEMPER TA PAGA