Willemstad, Resientemente Curaçao Quota Club a hasi donashon di algun buki edukativo tokante oido titulá “ Knoop het goed in je oren”, (konopé bon den bo orea) na Biblioteka Públiko di Kòrsou. E buki ta spesialmente pa e hóben haña informashon riba tur aspekto di oido. Awendia prinsipalmente nos hóbennan ta afektá nan oido ku e uso di spiker di orea (earphones) ku zonido demasiado duru.

E outornan di e buki ta speshalistanan riba e tereno di oido, manera dòkter  otorinolaringologo (KNO-Arts), Audicien (speshalista ku ta traha aparato di oido) i presidente di HAG (Stichting voor auditief gehandikapten).

E buki di Quota aki lo bai den e kolekshon di dokumentonan nashonal di nos biblioteka. Tambe e miembronan di Quota a laga algun buki na bali di biblioteka pa personanan ku ta interesá por risibí esaki komo kortesia di Curaçao Quota Club.

Quota ta sigui traha riba konsientisashon di nos pueblo pa kuida nos oido i ke pa mas hóben i organisashonnan edukashonal hasi uso di e informashon balioso ku e buki “ knoop het goed in je oren” ta kontene.

Pa medio di e komunikado aki Curaçao Quota Club ke enkurashá tur skol i organisashon ku ta deseá algún ehemplar di e buki “Knoop het goed in je oren” pa tuma kontakto via nos Facebook page of manda un mail na quotacuracao@gmail.com.

Alabes Curaçao Quota Club ke kòrda tur hende ku “ Di mas zonido, Ayó oido”