Curaçao,- Bou di interes grandi di prensa i públiko organisashon di  Curaçao International Film Festival Rotterdam a lansa e di tres edishon. Ku un dia èkstra pa e festival e oferta pa sine a keda ekstendé na 50 sine, dokumental i sine kòrtiku. Pero tambe pafó di teater den e área di festival rondó di Renaissance Mall tin sufisiente kos di hasi pa hóben i adulto durante e siman di 2 te ku 6 di aprel. E di tres edishon di e festival lo keda habrí ofisialmente djárason 2 di aprel ku e sine di India  Qissa die sineasta  Anup Singh. Qissa, e di dos pelíkula di Singh (1961) ku a nase na Tanzania i ku a krese na India, ta presentá un drama konmovedor di un famia di Sikh den e region di India Punjab, kaminda solamente yu muhé ta nase. Kon ku bai bini mester bini heredero yu hòmber. Ku prestashonnan di aktuashon impreshonante di Ifffan Khan i e hóben talento di Bengala Tillotama Shome.

Short Movies, BIG Stories

For di e rekòrt di 30 inskripshon pa e kompetensia di sine kòrtiku lokal e siguiente ganadónan di premio di hurado a keda skohé. Den e género di Fikshon:  Sint Elisabeth di Anja Steffens, Yuri Kneppers i Ralph Durgaram. Den e género di Dokumental:  Habri Bo Kurason di Ferdinand Rink i den e género di Muzik Video e premio di hurado ta bai pa The Heart of Creativity di Stacey Bohorquez. Por haña tur inskripshon riba e kanal di YouTube  di Curaçao IFFR. Ta presentá e pelíkulanan ganadó di premio di hurado durante e festival promé ku e nominadonan di e  Yellow Robin Award 2014. Ta pidi públiko pa vota pa nan favorito. Por haña e programa kompletu di sine  i tambe e programa  ‘More Than Film’ riba e website di Curaçao IFFR.  Benta di karchi pa e festival i funshonnan ta kuminsá djasabra 22 di mart na kaha di The Cinemas, for di 12:00 p.m.