Ku hopi entusiasmo direktiva di Prinses Wilhelmina Fonds a introdusí su proyekto den kua komunidat por duna sosten na nos muchanan ku keda detektá ku kanser. Speshal pa krea fondo pa su Kinderkanker Fonds, PWF a introdusí un “Childhood Cancer Gold Ribbon”, ku komunidat por kumpra i duna un sosten direkto na e fondo aki. Komo internashonal ta konsiderá e kolo oro komo e símbolo di solidaridat den e lucha kontra di kanser di mucha, e joya ta trahá di plata bañá den oro. E ta un diseño di Hermanus Jewelers trahá speshal pa Prinses Wilhelmina Fonds su Kinderkanker Fonds. Kumprando e joya aki, no solamente komunidat ta mustra su solidaridat ku tur mucha ku mester pasa den e trayekto difisil i pisá di tratamentu pa kombatí kanser, pero tambe e ta kontribuí direktamente pa yuda sostené e muchanan ku mester pasa den e proseso difísil aki. Personanan ku ta interesá pa duna nan sosten na e Kinderkanker Fonds i ke atkerí un di e “Childhood Cancer Gold Charm” por yama ofisina di PWF na telefòn 461-1998 òf manda un mail na goldribbon2013@gmail.com. Prinses Wilhelmina Fonds, komunidat di Kòrsou i nos muchanan ta gradesido pa bo sosten.

Kanser serka mucha

Un tema ku kada dia mas i mas ta yama nos atenshon ta, e kantidat di kasonan di kanser ku tin serka mucha. E pensamentu ku kanser ta afektá hende grandi so, ta kompletamente robes. Serka un mucha tambe sa diagnostiká kasonan di kanser. Antes tabata mas konosí ku muchanan tabata haña sierto infekshon. Awendia a konsekuensha di e avansenan den investigashonnan pa kombatí kanser, ta diagnostiká kanser tambe serka mucha.  Ounke mester bisa no muchu frekuente. Pero kada kaso di kanser serka un mucha ta un sla duru tantu pa e mucha komo pa e mayornan. Hopi kos ta kambia tantu den e bida di e mucha mes, komo serka su mayornan i tambe e ambiente ku e mucha ta biba aden. E kompleksidat ku tratamentu di kanser serka mucha ta trese ku n’e, ademas di e kuido intensivo i speshalisá ku e mucha mester haña, ta pone ku mester atendé e kasonan aki riba un otro nivel. Tratamentu di kanser serka mucha ta hopi intensivo, ta tuma su tempu i tin biaha mester hasi e tratamentu den eksterior. Esaki ta nifiká ku pa un periodo, e mucha no por hiba un bida normal mas, dor ku e ta konstantemente den tratamentu.

Kinderkanker Fonds

Na aña 2010 Prinses Wilhelmina Fonds, despues di a analisá e materia aki, a bin ku e inisiativa pa lanta un fondo pa por yuda muchanan ku tin kanser. Konhuntamente ku Ronald McDonald House Charities Curaçao Foundation (RMHCF) ta trata pa konsientisá komunidat riba malesa di kanser serka mucha i alabes ta informá komunidat, ku esnan ku mester di ayudo, ku tin un fondo spesífikamente pa yuda den e kasonan aki. Na aña 2011 huntu ku RBTT Bank N.V. awendia RBC Royal Bank N.V. a kuminsá un kampaña pa rekoudá fondo pa yuda muchanan ku kanser i nan famia. Dje forma aki, ku yudansa di RBTT Bank e Kinderkanker Fonds a bira un realidat.

E Kinderkanker Fonds di  Prinses Wilhelmina Fonds ta yuda ku :

–        Guia i preparashon di mayornan den e proseso pa bai ku nan yu den eksterior pa tratamentu. Den hopi kaso Prinses Wilhelmina Fonds ta duna un man dor di fasilitá paña pa friu i tambe dor di duna guia siko sosial;

–        PWF ta deliberá ku dòkternan, RMDHCC i tur instansha nesesario pa por akomodá e famia mas mihó ku ta posibel;

–        Banda di esaki tin e situashon, ku pa motibu di tratamentu, e mucha lo mester di bijlès òf lo mester bai un skol speshal durante un temporada. E kostonan adishonal di esaki difísilmente e mayornan por kubri;

–        Danki na e kontaktonan ku PWF tin ku instanshanan na Hulanda por a duna tambe sosten den eksterior. Mantenshon di e kontakto ku e famia dirèkt despues di tratamentu a mustra di ta hopi esensial, ta p’esei PWF ta trata pa duna un apoyo mas adekuá posibel, di moda ku e famia por sigui huntu i sigui ku nan bida normal. Te ku awor PWF por a sostené vários famia, danki na e Kinderkankerfonds, i di mes danki na tur e donashon i koperashon ku e ta risibí di komunidat. PWF ta sinti awor mas ku nunka, ku miéntras e diferente seguronan i tambe gobièrnu no ta yuda 100%, pa di un forma òf otro PWF por sigui duna su sosten na e famianan aki. Esaki ta nifiká tambe ku PWF mester sigui krea i mantené e fondonan nesesario pa sigui yuda den e kasonan di muchanan ku kanser. Den esaki, komersio i komunidat por duna un yudansa grandi.