42 instituto di kuido lo ser entretené dor di boluntario

Willemstad – Müzik ta e pashon di boluntario Pempy (Frensley) Lucas. Durante e ultimo 6 lunanan ela kompartí su pashon ku mas di 1000 grandi ku ta biba i pasa dia na diferente instituto di kuido rònt Kòrsou. Pa medio di müzik e ta entretené nos grandinan pa nan pasa un tempu ameno ku kantikanan di antes.

Pempy Lucas tabatin basta luna ta kana ku e idea pa hasi algu pa nos grandinan den kasnan di kuido, sabiendo ku vários ta pasa nan dianan isolá òf ku tiki bishita di amigu i famia. Curaçao Cares – un organisashon ku tin komo meta pa fasilitá trabou boluntario i trese hende huntu ku e fin di kontribuí na koheshon sosial– a ser aserká pa inisiá i kordiná e proyekto. Ku sosten di El Tributo e proyekto “Nos·tal·gia” a ranka sali den April 2015 i entre tantu Pempy Lucas a bishitá 24 kas di kuido rònt Kòrsou.

Marbella Pieter, lider di aktividat di Huize Welgelegen (Habaai) ta apoyá e inisiativa: “E tabata un bunita eksperensia. Nos klientenan a baila i gosa. Müzik tin un poder pa move hende i bo ta mira esei espesialmente serka nos klientenan ku Alzheimer. Nan a haña sintimentu di nostalgia, komo si fuera nan tabata na un fiesta di antes. Dianan despues ainda nos klientenan a sigi papia, ken ta kanta e miho bolero òf ken tabata kanta e miho kantikanan di antes.” E ta kompartí, “nos ta plania diferente akitividat, pero ora un boluntario manera Pempy Lucas bin kanta live, ta enteramente un otro eksperensia. Esaki bo por mira bèk den e manera ku e grandinan ta ekspresá nan mes na momento ku Pempy Lucas ta kanta pa nan”

Durante di e proyekto ‘Humans of Willemstad’ ta sigi boluntario Pempy Lucas tur siman na un otro instansia di kuido pa kompartí e kuentanan di nos grandinan ku un publiko mas amplio via nan pagina di Facebook. Esaki ku e meta pa trese generashonan mas serka di otro i krese kombibiensa.  Boluntarionan di El Tributo tambe ta duna un man. El Tributo ta duna trahadonan e oportunidat pa djòin e proyekto den oranan di trabou pa asina gosa ku nos grandinan.

Pempy Lucas ta kontinua ku hopi energia. Durante e proksimo lunanan e lo bishitá 23 kas di kuido mas pa asina kompleta 1 aña di e tour ‘Nostalgia’. Curaçao Cares ta yama bon biní na tur boluntario, famia, grupo di baile i musiko ku kier pasa un mainta òf mèrdia alegre ku e klientenan di kasnan di grandi. Boluntarionan interesá por inskribí nan mes riba website di Curaçao Cares (www.curacaocares.org).