Tres luna pasá Ministro di Tráfiko, Transporte i Planifikashon Urbano, sra. Camelia-Römer a entregá un permit, pa planta datu- i kadushinan chikí na tres sitio den areanan di konservashon di naturalesa,  na biólogo Ir. Anna Rojer. E plantamentu di datu- i kadushinan chikí ta forma parti di un estudio di e relashon entre datu- i  kadushinan un banda i bestianan, ku ta benefisiá di e kaktùsnan, otro banda. E estudio akí ta tuma lugá bou supervishon di Dr. S. Petit di ‘University of South Australia’. Komo biólogo lokal Anna Rojer no por a hasi e trabou di plantamentu su so. El a haña yudansa di un tremendo tim di 18 boluntario, amantanan di naturalesa, ku a soportá e kalor imenso di e último tempu huntu ku sirkumstanshanan pisá di nos mondi yen sumpiña, pa kumpli ku e tarea di plantamentu den un lapso di tempu di 4 siman.  Diadomingu 25 di oktober nan por a selebrá ku tur 393 planchi a bai mondi. Riba potrèt por mira un parti grandi di e tim di boluntario huntu ku Anna Rojer.