Lovers huntu ku Rumenigge Hanst a uni un biaha mas pa bolbe aportá na pueblo di Kòrsou ku inisiativa nan positivo. Ami Riba Pia ta un proyekto ku ta krea kupo di trabou speshal pa nos hóbennan ku a yega di haña nan mes den kamindanan ménos bon i ku awor ke lucha pa bai dilanti.
Pa medio di esaki nos ke introdusí e proyekto “Ami Riba Pia.” Ami, Rummenigge Hanst ta un hóben adulto ku a bini ta lucha duru pa mi bai dilanti. Mi eksperensia di bida a inspirá mi pa mi hasi bon i wak kon mi por duna un man yuda otro hóben i otro personanan pa nan no kai den kamindanan ménos positivo di kual despues mester arepentí di dje.
Tumando esaki na kuenta mi a aserka nos kompania lokal, Lovers, ku mi idea pa e proyekto “Ami Riba Pia” pa asina wak kon e kompania por duna su aporte na e proyekto aki. Mes ora Lovers a aseptá pa kolaborá huntu ku mi pa hasi e idea aki bira un realidat. I huntu ku Lovers reclasseringbureau Curaçao tambe lo duna su aporte na e proyekto aki.
E meta di e proyekto aki ta pa krea kuponan di trabou nobo. Na momento ku bo wòrdu selektá bo lo bira un representante di Lovers. Esaki ta nifiká ku e persona aki lo subi kaya di un forma independiente pa bende produktonan di Lovers na un preis ekonómiko. Lovers lo provehe tur lokual ta nesesario pa e persona aki por ehersé su trabou. Nos tin un supervisor (mener Eugene Jansen) asigná ku lo sòru di hiba e persona na su punto di benta tur dia i lo sòru di buska e persona bek despues di su orario di trabou . Huntu ku e supervisor di Lovers lo hasi un resúmen di e benta di dia.
Lovers lo tei pa duna guia i sosten na e trahadó independiente aki na tur momento. Pues nos ta enkurashá tur esnan ku ke apliká pa no tene miedu ni bèrgwensa pa tuma kontakto ku nos.
Nos ta kontentu ku e proyekto aki lo bai bira un realidat i ku pa 14 di Òktober nos por ranka sali. Pa tur esnan ku ke apliká, por tuma kontakto libremente na: +5999 6700358.
“Di pueblo pa pueblo, trabou tin! Bèrgwensa pa traha? Nunka, bèrgwensa pa ta bashí? Sigur ku si. Ban lanta riba pia i demostrá ku nos por.” –