Deporte ta desaroyá e parti físiko di un persona i na mes momentu ta bon tambe pa krea siudadanonan ehemplar. Teniendo esaki na kuenta, Fundashon Desaroyo Deportivo Kòrsou (FDDK) huntu ku su partnernan Ministerio di Hustisia di Kòrsou, Ministerio di Hustisia di Ulanda i Fundashon Bon Intenshon a inisiá ku e proyekto piloto ‘Ami, mi mes i mi logronan’ aña pasá.

E proyekto aki, ta duna 20 hoben e oportunidat pa praktiká e deporte di basketbòl tra’i mèrdia na skol mes, unabes nan terminá nan debernan eskolar. ‘Ami, mi mes i mi logronan’ a inisiá na St. Jozef VSBO. Ku e proyekto aki, por a nota kambionan positivo den komportashon di e hóbennan i tambe a mira e estímulo pa hasi deporte tantu dor di nan mes komo esnan rondó di nan.

Despues di a evaluá e proyekto e siman aki, partnernan a yega na un kombenio pa alargá e proyekto ku 1 aña mas. 1 aña èkstra lo duna mas hóben e oportunidat pa krea un mentalidat positivo, un kurpa sano i tambe ta e bon ehèmpel den nos komunidat. E proyekto no solamente lo alargá ku 1 aña pero alabes a agregá baseball, danki na sosten di Ministerio di Hustisia di Hulanda.

FDDK ta ekstendé su gradisimentu na Minister di hustisia sr. Nelson Navarro i tambe sr. Gregory Elias di Fundashon Bon Intenshon pa kere tantu den FDDK komo e proyekto en partikular.

Riba foto: sra. Hanneke Sint di ministerio di hustisia hulandes, embahador di ‘Ami, mi mes i mi logronan’ sr. Ramiro Balentina, Minister di Hustisia Mr. Nelson Navarro, direktor di FDDK sr. Thakaidzwa Doran, pelotero sr. Raily Legito i sr. Raoul Atminah di ministerio di hustisia hulandes