Na momento cu turistanan di barco crucero yega Aruba, un di nan opcionnan ta pa disfruta di nos beachnan. E problema ta cu na un dado momento e fluho di cantidad di turistanan di e barconan crucero a aglomera na e beachnan na Palm Beach mirando cu ta akinan nan tin tur e facilidadnan necesario. Poniendo un presion enorme pa e huespednan di e hotelnan den e area aki. Ministerio di Turismo a pone como un di e puntonan di enfoke pa alivia e presion aki, creando facilidadnan disponibel pa nos turistanan y localnan na otro beachnan publico pa tur hende tin mas opcion. Un di e opcionnan aki cu un facilidad completamente nobo, ta e beach di Surfside.

Minister Otmar Oduber a pasa bishita e trabounan andando na e sitio pa asina haya un miho bista di riba e desaroyo di e proyecto specifico aki. E proyecto aki ta financia pa un combinacion di FDA conhuntamente cu TPEF. Sr. Oduber ta bisa: “E proyecto ta un preciosidad cual ta calcula cu pa fin di october mester keda completa. Esaki lo conecta Linear Park I cu Linear Park II combina cu e trabounan cu ta haciendo den e lama tambe, unda a percura cu no solamente pa e parti infrastructural riba e beach, pero tambe e lama mes haya su debido atencion creando un beach di miho calidad pa uzo di nos bishitante pero tambe pa nos propio hendenan.”

E proyecto di limpieza di lama ta un proyecto financieramente carga pa Aruba Tourism Authority, di cual e Mandatario ta comenta di mira con un combinacion di diferente fondonan ta traha na bienestar di un solo meta, pa crea un miho Aruba. Minister Oduber ta sigui bisa: “Un meta pa eleva Producto Aruba pa atrae turistanan di calidad, manera ta e intencion di henter e maneho di Ministerio di Turismo y di Gabinete Mike Eman 2.”