huntu ku Willy Rodriguez, Aemy NiaFeliz, Shelomi Doran- Bakhuis, Wladimir Kleinmoedig, Chesron Richardson i Raimy-Jonathan Juliet

Willemstad- Ayera 19 di aprel 2021, Proskuneo a lansa un kansion nobo titulá “Kòrsou mi dushi isla” den kolabrashon ku diferente artista lokal, Willy Rodriguez, Aemy NiaFeliz, Shelomi Doran- Bakhuis, Wladimir Kleinmoedig, Chesron Richardson i Raimy-Jonathan Juliet. Un tumba alegre ku letranan poderoso pa bendishoná Kòrsou nos dushi isla i pa enkurashá nos tur komo yu di Kòrsou pa pone tur diferensia, pleitamentu i desperdisio un banda pa nos por traha duru den armonia i union pa progreso di nos nashon.

E tumba aki ta produsí lokalmente pa un hóben yu di Kòrsou Raimy- Jonathan Juliet i kompositá pa Raimy- Jonathan Juliet mes huntu ku Willy Rodriguez. Ta nos orashon ku e kansion aki lo rekòrdá kada siudadano kuantu potensial nos pais tin i ku ta nos tin e poder pa laga nos pais progresá, manera e letranan di e kansion aki ta bisa: “Dios tin nos pais den Su man, ku fe den Dios nos pais lo floresé. Ban tur hende, man na obra, si nos uni, nos lo logra, traha duru p’e, pa nos disfrutá di dje.”  Laga nos kada un duna di nos parti pa hasi e letranan aki bira realidat den kada skina di nos komunidat.

Bo por pidi pa “Kòrsou mi dushi isla” na bo radio emisora preferí na Kòrsou, Boneiru i Aruba i tambe e ta disponibel riba varios plataforma digital (YouTube, Apple Music, Amazon Music i Spotify).

Skuch’é, disfrutá di dje i mas ku tur kos, laga e letranan di e kansion aki penetrá den nos kurason i hasi nos kompromiso pa traha pa adelanto di nos pais Kòrsou aun mas fuerte. Pa mas informashon por bishitá Proskuneo su página di Facebook, Instagram (@proskuneocuracao) i tambe nos kanal di YouTube: Proskuneo Curaçao. Kòrsou mi dushi isla! ●