Willemstad- Proskuneo huntu ku e kongregashon di Iglesia House of Worship ta den un siman di selebrashon, konmemorando 20 aña di eksistensia di tantu iglesia House of Worship komo e tim di alabansa Proskuneo. Durante e 20 añanan tras di lomba Dios a hasi kosnan ekselente i Iglesia House of Worship ke gradisí Dios huntu ku henter e pueblo di Kòrsou den dos anochi spesial di selebrashon i adorashon.

Komo parti di e selebrashon spesial aki Proskuneo ta lansa su album nobo titulá Dios sin límite durante un anochi festivo di alabansa djabièrnè awor 25 di mei pa 7:30 pm na Iglesia House of Worship. E album aki ta kontené 12 kansion di alabansa di kalidat musikal haltu i ta konta ku kolaborashon di entre otro Willy Rodriguez (di Hulanda) i tambe Nathan Senchi (di Boneiru). Na final di e selebrashon lo tin espasio pa “meet & greet” e integrantenan di Proskuneo kaminda tur presente tin e oportunidat pa saka potrèt i risibí firma riba e disko kompakto nobo.

Na aña 1998, Dios a yama Pastornan Raimy i Arlette Juliet pa kuminsá ku e obra di Dios. Parti di e vishon di iglesia House of Worship ta pa krea adoradónan ku ta adorá E Tata den spiritu i den bèrdat manera Huan 4:23 ta bisa. Asina e tim di alabansa Proskuneo a nase den momentunan profundo di adorashon 20 aña pasá. Proskuneo ta nifiká entre otro sunchi man di un hende òf kai na rudia den reverensia. Na inisio, Proskuneo tabata konsistí di un tim di 8 adoradó, inkluso pastor Raimy Juliet mes. Proskuneo a krese i desaroyá den e 20 añanan akí komo un ministerio di alabansa i adorashon, ku ta marka e diferensia den krea un momentu di adorashon i komunion ku Dios, i di hiba e pueblo den e enkuentro sobrenatural akí. E ministerio akí a produsí mas ku 20 produkshon ku kansionnan inspirá pa Spiritu Santu, manera “Nò, nò, no preokupá bo”, “Kosnan Grandi”, “Yunan di Dios”, “Dios lo restourá” i “Viktoria”, ku for di inisio te awe ta toka bidanan i inspirá kada un ku skucha pa adorá Dios.

Durante luna di yüni próksimo Proskuneo lo bai tin diferente “pop up concerts” grátis spesial pa e pueblo di Kòrsou. Na diferente sitio konosí na Kòrsou Proskuneo lo presentá nan kansionnan di alabansa i adorashon i tambe lo tin diferente sorpresa pa e pueblo di Kòrsou. Pues pa bo keda na altura di tur loke Proskuneo tin prepará, “like” nan página di Facebook “Proskuneo” i tambe “Iglesia House of Worship Kòrsou” riba Facebook i Instagram. Pa finalisá nos ke ekstendé un invitashon na henter e pueblo di Kòrsou pa ta presente djabièrnè awor 7:30 pm na iglesia House of Worship pa e lansamentu di e album nobo Dios sin límite. Pa mas informashon i kompra di disko kompakto por tuma kontakto ku nos na tel: 738-4343 òf por pasa personal na ofisina di Iglesia House of Worship na Erosweg 52.