Aruba Bank ta sigui innova y adapta pa futuro

ORANJESTAD, Aruba – 12 di januari 2016: Aruba Bank ta e pionero den e segmento bancario na Aruba. Semper Aruba Bank a sigui desaroyonan den nos comunidad, identificando necesidadnan y rekisitonan di nan clientenan riba e tereno aki y asina ta sigui cambia, innova, y adapta pa brinda e miho producto y servicionan. Actualmente e desaroyo mas nobo den e institucion Arubano aki ta e introduccion di un “Mainstreet Express Branch” den Caya Betico Croes #41, unda cu e fundadonan di Aruba Bank a cuminsa brinda servicionan bancario 90 aña pasa.

E edificio original ta wordo uza pa un otro proposito, mientras cu lo sigui brinda servicio den un area di mas of menos 78 meter cuadra cu lo reemplasa e edificio cu a wordo construi den añanan 1920. Na cuminsamento di e aña aki lo keda cla cu construccion di e proyecto, cu ta e prome concepto di “self-service banking” na Aruba. Lo brinda servicionan bancario completamente modernisa, cu ta facilita transaccionnan  den forma automatisa. Aruba Bank ta mira e balor di mantene su presencia den centro di Oranjestad cu servicio facil y rapido pa esunnan cu ta traha y biba den cercania. Aparte di mantene su presencia historico den centro di ciudad, Aruba Bank Mainstreet Express Branch lo sigui conta cu su parkeerplaats pa acomoda clientenan cu ta bishita e sucursal y tambe ta aporta na e infrastructura fresco y moderno di nos caya principal renoba. E apertura  di e Main Street Express Branch lo tuma luga pronto. Esaki ta bira e prome sucursal bancario cu lo brinda posibilidad nan bancario rapido, facil y combiniente pa e bida druk di nos clientenan.