Kresementu sigurá den un merkado diversifiká:

WILLEMSTAD – 10  di yüli  2013:- Luna di Mei sigur a nifiká un luna di kresementu pa turismo di estadia na Kòrsou, sifranan preliminar ta mustra ku den e luna aki 33,190 turista a bishitá Kòrsou. E sifra aki ta 8% mas haltu ku e sifranan den e mesun luna na aña 2012. Debí na e diverso merkadonan na unda ku Kòrsou ta keda promové, ta keda mira resultadonan positivo aunke ku e merkadonan mas grandi kisas por a baha den porsentahe di estadia. Di akuerdo ku Ofisina di Turismo di Kòrsou (CTB), e kresementu ta un refleho direkto di e promoshon kuantioso i diverso ku Kòrsou a bin ta risibí den eksterior komo un destinashon faborito den Karibe. Diversifikashon di promoshon den diferente merkado ta amplia e plataforma na unda ku ta presentá Kòrsou, i nos lo  mira su frutanan próksimamente. Ademas di esaki e promoshonnan no ta únikamente pa trese e turista Kòrsou, sino a hasi promoshon interno tambe ku ta nifiká ku unabes e turista ta riba nos isla, e makinario turístiko di Kòrsou ta traha ku un solo meta den mente i esei ta, pa ofresé un aktitut di ‘Dushi Hende’. Esaki ta garantia pa e regreso di e turista i pa promoshon ‘di boka pa boka’.

 Mei 2013:

Turismo di estadia for di Nort Amérika a krese leve ku 1% den luna di Mei ku ta ekivalente na 5,374 for di e region aki. Sifranan di bishitante for di Merka (USA) a registrá un kaida leve di 1% ku 5,066, Canada na su turno a registrá un kresementu di 22% pa e luna di Mei 2013. Merkado di Suramérika a oumentá ku 31% den luna di Mei 2013, ku un total di 10,478 turista di estadia kompará ku 8,028 den 2012. For di Venezuela un total di 6,985 bishitante a keda registrá, esaki ta un oumento di 23%. Sürnam, Colombia i Brazil tambe a registrá un oumento den turismo di estadia, esakinan ta 56%, 61% i 29% respektivamente. Den sifranan apsoluto e paisnan sekundario den Suramérika a registrá 1,053, 802 i 775 den turista di estadia. Merkado di Oropa a registrá un kaida di 5% den Mei 2013; e merkado aki a trese un total di 12,679 turista pa Kòrsou, esaki tabata  13,363 durante e mesun luna na 2012. E pais ku usualmente ta pèrkurá pa un mayor kantidat di turista, Ulanda– e luna di Mei ta konosé un kaida di 9%. Pa luna di Mei nos ta risibí 10,037 turista for di Ulanda, kompará ku 11,005 den 2012. Alemania a kai registrando 2% ménos turista di estadia, ekivalente na 1,193 bishitante, aña pasá esaki tabata 1,222.  ‘Stay Over’ di den Karibe a baha ku 1% den luna di Mei. E bishitantenan for di Aruba a baha ku 5%, ekivalente na 1,637. Sifranan di turismo krusero ta registrá un kresementu signifikante di 292% den Mei 2013. E kantidat di ‘ship calls’ a subi ku 500%, por menshoná ku un total di 12 barku krusero a bishitá nos isla. Tur huntu nan kapasidat pa trese 26,775 turista pa Kòrsou. Aña pasá den e mesun luna tabata tin 2 barku ku a bishitá nos portanan, ekivalente na 6,825. E  motibu ku ta mira un kresementu grandi den e kantidat di turismo krusero, ta ku desde dia promé di mei último, e barku ‘Monarch’ di e linia ‘Pullmantur Cruise’ ta mara un biaha pa siman riba djarason den nos haf. E barku aki su kapasidat di turista krusero ta 2,852 pasahero. Na mei 2013 e barku aki a bishita Kòrsou 5 bia. CTB ta keda hasi su esfuersonan pa promové Kòrsou internashonalmente, por a mira ku Kòrsou tabata tin bon representashon na e Maracaibo Travel Shop resientemente, esakinan ta yuda mantené e bon resultadonan ku a sá di optené den e promé mitar di aña. Ganando un “Zoover Award” komo mihó destinashon na Ulanda, ta esfuersonan en-konhunto ku otro partnernan den industria turístiko i ku lo bai duna su frutanan próksimamente. E sifranan positivo ta resultado direkto di un industria ku ta traha pa alkansá ekselensia.