Willemstad — E bolsa internashonal di balor di Kòrsou, Dutch Caribbean Securities Exchange konosí komo “DCSX” , ta anunsiá ku siman pasa nan a realisá  nan promé transakshonnan di kompra I benta di akshon riba e bolsa. Director di DCSX Sr. René Römer a bisa ku esaki ta un logro hopi grandi I importante pa e desaroyo di e bolsa. “Riba nos bolsa, tantu kompanianan lokal (entre kua tambe kompanianan di Gobiernu) komo esnan internashonal por “list” nan mes I atraé kapital pa medio di emishon di bono òf akshon. Tambe por tin otro motibunan ku ta hasi ku un kompania ku ta ser listá por tin sierto bentahanan ku ta mas bien riba e tereno di transparensia, merkadeo òf di sierto bentahanan di impuesto,” e la bisa. Ku e paso aki di e  promé transakshonnan ariba menshoná nos bolsa ta riba e bon kaminda pa di un manera sigur, , bon organisá I ku preisnan internashonalmente hopi kompetitivo, establesé su mes komo e bolsa di eskoho pa kompanianan lokal I internashonal chikitu I mediano. DCSX ta gradisí tur a instansianan profeshonal , inkluyendo Gobièrnu, ku ta sigui yuda pa e bolsa bira otro parti importante di e servisionan finansiero, tantu lokal komo internashonal, ku nos ta ofresé na I for di Kòrsou. Hopi biaha desaroyonan nobo riba tereno finansiero ta tuma tempu I por parse difísil pa establesé, pero ku e transakshonnan ku a kaba di tuma lugá, un paso hopi importante a wòrdu tuma pa ekspandé nos servisionan finansiero ku nos ta ofresé for di Kòrsou.