WILLEMSTAD — E apertura di e promé klup di Padel na Kòrsou ta un echo. Riba djadumingu 27 di febrüari a tuma lugá apertura di Padel Curaçao na Seru Loraweg (dilanti Fereteria). Padel Curaçao a ser inisiá dor di Tim Koch, hungadó i ‘coach’ di Padel. E deporte di Padel ta kresiente i ta birando mas i mas popular dor ku e ta basta fasil pa hunga. E ta mas aksesibel ku tènis i hungadónan di tur edat i nivel ta bon biní.

Tim Koch semper tabata tin un amor i pashon pa diferente deporte di raket, manera tenis, ‘beachtennis’, squash i padel. E tin años di ekperiensia komo coach di tenis i 2 aña komo coach di beachtennis. ‘Komo fanatiko di padel, mi kier por a hunga padel na Kòrsou tambe, pero esaki te ku awor no tabata posibel. Padel Curaçao ta introdusí e deporte na Kòrsou i ta habri kanchanan di Padel p’asina mas hende por praktiká e deporte riba nos isla bunita. Su amor pa Kòrsou i padel ta bini bèk den e logo di e kompania.

Padel tin elementonan di squash i tenis i por hunga individual i den grupo. Aworaki Padel ta wòrdu mirá komo e deporte ku ta kresiendo mas lihé na mundu ku 8 mion hungadó rònt mundu i ku kresementu di 250,000 hungadó pa aña. E deporte ta mas grandi na Spaña (11,500 kancha) i Argentina (8000 kancha). Na Hulanda tambe padel ta kresiendo lihé ku 75,000 hungadó (25,000 na klùpnan) i mas ku 500 kancha di padel na 215 lokalidat. Prinsipalmente hendenan ku a yega di hunga tenis, badminton òf squash ta kuminsa hunga padel.

Lo duna lèsnan di padel na Padel Curaçao, pero tambe ta hür kancha ku esnan interesá. Ta duna lès di padel na mucha for di 4 aña i na adulto. Orario di apertura ta djaluna te ku djabièrne 07:00 – 12:00 i 17:00 -22:00 i riba djasabra 7:00 – 12:00. 

Padel Curaçao ta invitá tur interesado pa bin purba hunga padel. Reservashon por wordu hasí via di website www.padelcuracao.cw. Den e siman di apertura di Padel Curaçao (28 febrüari-5 mart) tin un speshal kaminda bo por partisipá ku 3 amigu/a na un lès di padel. Tambe lo tin mas akshon spesial den e luna di apertura. Keda na altura via di nos kanalnan sosial:

Website: www.padelcuracao.cw

Email: info@padelcuracao.cw

FB page: Padel Curacao

Instagram: padelcuracao