A elaborá riba desaroyonan den mundu finansiero

WILLEMSTAD – Djaweps último, Baker Tilly Kòrsou a organisá e promé konferensia ‘Financial Leaders’. Kubriendo e tema ‘Surviving in a world full of information and changes’, partisipantenan a keda inspirá ku seshonnan masha informativo tokante diferente desaroyo den mundu finansiero riba tereno di belasting, digitalisashon i lei. Tambe nan por a partisipá na un tayer interaktivo na unda ku por a siña usa ‘e mente’ di un forma mas efisiente. Entrada tabata grátis pa tur lider finansiero den nos merkado.

E oudiensia ademas di invitado, a konta tambe ku empresarionan, partnernan di institushonnan finansiero manera, banko, ofisina di trust i accountancy, pero tambe mènedjernan finansiero di empresanan grandi.

E konferensia a dura mitar dia i a keda ofisialmente habrí dor di accountancy partner di Baker Tilly Kòrsou, sr Frank Groenewegen ku a duna un introdukshon di e tema pa despues pasa palabra na sr. Roderik van Hees di VanEps Kunneman VanDoorne ku a kontinuá ku un seshon tokante ‘Developments in directors’ liability’. Ademas di sr. Van Hees, tabata tin seshonnan interesante di Paul Durward di Atlas Fund Services i Priscilla Lotman di Frontshore ku a duna un presentashon duo di e tópiko Crypto Currency & Block Chain i e desaroyonan aktual di esaki. Artur van Aalst di Baker Tilly Kòrsou a duna tur presente un bista di e desaroyonan den mundu di impuesto na Kòrsou i tambe pa sobrá mundu na unda ku tin hopi kambio ta tumando lugá.

E dia a keda klousurá ku un tayer interaktivo ku presentashon di Mark Tigchelaar, ku konhuntamente ku tur partisipante a trese den práktika e manera mas efisiente pa usa nos mente; no ta ‘time management, sino brain management’. Ku algun quiz interaktivo públiko a siña den apénas 1 ora kon pa oumentá nan produktividat ku 40%. Despues di e presentashonnan, invitadonan por a disfrutá di un biña ofresí pa e kompania Servir Frais. Frank Groenewegen inisiadó di e proyekto i partner na Baker Tilly Kòrsou a indiká di ta masha kontentu ku e resultado i ta mira bèk ku satisfakshon na e promé konferensia ‘Financial Leaders’.