Willemstad, 9 yanüari 2013 – Awe tardi den un esfera ameno SAMBIL Curaçao a tene su promé enkuentro pa aña 2014. Señor Alejandro Cohen huntu ku Ashanty Bonafasia (enkargá ku Sales & Marketing pa Sambil Curaçao) a risibí representantenan di Kamara di Komersio, representantenan di CHATA, representante di CTB, Komishon Wishi i Marchena i tambe nos miembronan di prensa. A kuminsa e enkuentro ku un presentshon di ken ta SAMBIL, splikando tambe kiko ta e plannan pa SAMBIL Curaçao. Durante e presentashon a mustra un video kaminda por a mira e inougurashon ofisial di Sambil Sto. Domingo, ku ta e sentro komersial ku Konstruktora Sambil a habri promé ku nan bini Kòrsou. Pa e inougurashon a organisá un serie di aktividatnan kultural, musikal ku hopi ambiente pa e pueblo kompleto. Ta e intenshon pa hasi algu similar pa e apertura di SAMBIL Curaçao tambe. Durante un rekorido den e konstrukshon mes, presentenan por a haña un bista di e avansenan i tambe mira algun di e nòmbernan ku tin espasionan reservá kaba. Manera ta konosí SAMBIL ta plania pa habri su portanan den luna di mei i aworaki konstrukshon a drenta su fase final. E enkuentro di awe a simbolisá apertura di un seri di oportunidat pa instansha i organisashonnan lokal i internashonal, pero tambe miembronan di nos komunidat sera konosi ku e proyekto promé ku e sentro komersial habri su portanan ofisialmente. Konstruktora Sambil no solamente ta konstruí un sentro komersial, pero ta hasi mas ku esaki. Entre otro organisá proyektonan komunitario i boluntario den bario. Esaki ta trese kune ku e relashon i presensia di por ehèmpel Komishon Wishi i Marchena tabata hopi importante awe. SAMBIL ta bai bira un produkto di Kòrsou, pa Kòrsou i famia Cohen ta brasa habrí pa un i tur. Mientras tantu e trabounan ta sigui kana sperando ku komunidat ta kuminsa mira e balor agregá ku e sentro komersial ta trese pa nos pueblo en general, nos Turismo, nos sektor Komersial pero tambe pa futuro di nos dushi Kòrsou i generashonnan ku tin ku bini.