…antisipando gran festival di CNSJ …

WILLEMSTAD – Den antisipashon pa e próksimo Curaçao North Sea Jazz Festival, Renaissance Curaçao Resort ta introdusí e promé edishon di Curaçao North Sea JAMZZ. E idea di presentá e proyekto musikal ku presentashon di artistanan internashonal ta netamente pa añadí espektativa na e festival di mas grandi riba nos isla. Anualmente Renaissance Curaçao Resort ta e ‘kas’ pa mayoria di e artista i músikonan ku ta presentá durante di e festival.

Riba dia 29 di ougùstùs próksimo komunidat di Kòrsou por kuminsá eksperensiá e vibrashon musikal. Tur kos ta kuminsá ku un dia di kompra ku deskuentonan spesial na diferente establesimentu di kalidat haltu na Renaissance Mall i Rif Fort; chek bo ‘outfit’ pa e dianan di festival na preisnan atraktivo! Pa e dia aki tur establesimentu lo ta habri te 9’or di anochi. Ku kada kompra na establesimentunan i restorantnan na Renaissance Mall & Rif Fort, e kliente por skirbi su datos nan riba su resibu pa e chèns di gana karchinan di entrada pa Curaçao North Sea Jazz Festival. Lo anunsiá e ganador dia 31 di ougùstùs. Sigui Renaissance Mall & Rif Fort su pagina riba Facebook pa mas informashon.

Presentashon di artistanan lokal i internashonal; entrada grátis!

Pa kompletá e eksperensia di kompra lo harma 3 esenario riba kual lo tin presentashon di vários artista, inkluyendo artistanan internashonal. Entre 4:30PM i 12:30AM lo tin presentashon di DJ Lu-C, DJ Paco, DJ Ro-1, Gino & Co., Gilmar Fraites, Hershel Rosario & Co., Junior Tecla, Perfect Fourth, Tumabo Curaçao i un presentashon spesial di KY3 for di Venezuela i Maite Hontelé for di Hulanda. Entrada ta grátis! Renaissance Curaçao Resort, Mall i Rif Fort ta ekstendé un invitashon na tur amante di bon músika pa dia 29 di ougùstùs próksimo nan sali kas disfrutá i kuminsá antisipá e ambiente di CNSJ den e promé edishon di CNSJMZ.