WILLEMSTAD — Bou di e slogan “Yena bo bida i di otronan ku koló”, EY Dutch Caribbean, ku ta selebrando 65 aña, i JCI Dutch Caribbean a organisá djadumingu dia 1 di yüni e promé edishon di Curaçao Color Walk. E “fun walk” di 5 kilometer aki den kayanan di Otrobanda, a kuminsá i kaba na Brionplein. E aspekto úniko di e festin di koló deportivo aki tabata ku partisipantenan a ser kubrí ku puiru di diferente koló na diferente punto durante e ruta. En espeshal na final e evenemento a kulminá den un fiesta di koló.
Fotógrafo: Jason Rafaёl
E kaminata di koló aki ya a tuma lugá na diferente país rònt mundu i awor Kòrsòu tambe por ta orguyoso di por pertenesé na e grupo aki. Na okashón di nan 65 aniversario i revelashon di nan slogan nobo “Building a better working world”, EY a lanta un komishon interno (EY Cares) ku lo sigi duna kontenido na EY su programa di responsabilidat soshal i lo traha pa duna un aporte pósitivo i duradero na desaróyó di nos komunidat. Den e kuadro aki EY tambe ta traha huntu ku Curaçao Cares. Basá riba e vishon i dedikashon mutuo pa ehersé responsabilidat sosial ku EY Dutch Caribbean i JCI Dutch Caribbean ta kompartí, nan a uni forsa pa huntu organisá e promé ‘fun walk’ di koló na Kòrsou. JCI Dutch Caribbean ta e organisashón nashonal di tur e organisashonnan lokal di Aruba, Kòrsòu i St. Maarten ku ta pertenesé na JCI (Junior Chamber International) ku konosé 200.000 miembro aktivo rònt mundu entre 18 i 40 aña ku ta traha pa krea impakto positivo den nan mes komunidat.
Tremendo ambiente
E mainta a start ku e oportunidat pa partispantenan prik i kontrola nan suku na stènt di SOKUDI. Después di un tremendo ‘warm up’ ku Haynrich Juliana, e partisipantenan a kuminsa ku e kaminata. Na kada un di e 7 stashon di koló riba e ruta partisipantenan a wòrdu di spùit ku un puiru di koló ora nan pasa. E impakto di koló a resaltá riba e “T-shirt” blankunan ku partisipantenan a bistí. Támbe kada un di e stashonnan a sòru pa un tremendo ambiente musikal ku tur partisipante a gosa un bòl di dje. Kada stashón di koló a ser realisá ku sostén di algun spònsòr prinsipal, esta Maduro & Curiel’s Bank N.V, Subway, K-paint by Kooyman, Badia Coconut Water i U by Kotex di Pietersz Import, Amicorp i naturalmente EY. Bèk na Brionplein, e evenemento a kulminá ku un “splash” di koló patrosiná pa SIXT rent a car. Seguidamente Daniel Yung a sòru pa un tremendo “cool down”. Partisipantenan por a disfruta di awa, juice, fruta i tambe e tremendo after party ku a sigi ku MC Hype i DJ Maarten Schakel. Ademas tur pasrtisipante a haña e oportunidat pa forma parti di e promé “Curaçao Inclusion Symbol” (CIS), un proyekto di United Nations Development Program Curaçao (UNDP). CIS ta enserá ku personanan por laga marka di nan “duim” atras riba varios bolitas di klèi. Nan lo forma parti di un obra di arte nashonal ku lo ser trahá bou di guia di artista renombrá Ellen Spijkstra i un tim di artista lokal. E obra di arte aki lo representá un símbolo di inklusividat ku lo haña un lugá permanente den Otrobanda. Un danki tambe ta bai na Guardian Group Dutch Caribbean (Fatum), Lovers, Media599 i tur otro sponsornan ku a yuda hasi e evento aki posibel. Támbe nos ta gradisí di kurasón tur e voluntarionan ku a dona nan tempu liber pa yuda na evento aki. Nos ta agradesido na polis ku a kopera ku e evenemento aki, tambe na Top Professional Cleaning ku a laga e kaya nan di Otrobanda keda limpi limpi.
Sigiente edishon
A organisá e kaminata aki ku e intenshón pa hasi e bira un evenemento anual. Team Curacao Color Walk ta sumamente agradesido na tur e partisipantenan ku támbe a kontribuí ku e bon kousa di e evento aki: fundraising JCI Dutch Caribbean i donashon na SOKUDI i YAVE(Un proyekto di FAJ). Nos ke invitá pueblo di Kòrsòu kompletu pa keda pendiente pa Curaçao Color Walk 2015. 
Pa mas informashón i detayenan ésklusívo di e promé edishón di Curacao Color Walk, bishitá e página di Facebook (www.facebook.com/curacaocolorwalk) òf mail nos curacaocolorwalk@gmail.com