Riba djabièrnè 2 i djasabra 3 di ougùstùs próksimo lo tuma lugá e promé edishon di e Caribbean Job Fair. E evento akí ta un esfuerso konhunto di HR⁺ B.V., D&I Business Support Services N.V.,  Ministerio di Desaroyo Sosial, Labor i Bienestar (SOAW) i Universidat di Kòrsou mr. dr. Moises Frumencio da Costa Gomez (ántes UNA). Pa dos dia konsekutivo empresanan, organisashonnan, institutonan i entidatnan (di gobièrnu) tantu lokal komo di den region lo tin e posibilidat di presentá nan mes i indiká kua vakaturanan nan tin aktualmente i lo bai tin den futuro serkano. Banda di esei tambe nan lo duna informashon relevante tokante nan produkto- i servisionan ku ta di interes pa e bishitantenan. Buskadónan di trabou, studiantenan ku a kaba di gradua i empleadonan ku ta en buska di un reto diferente, por orientá nan mes den e mundu di vakaturanan i posibilidatnan di desaroyo personal i por laga informá nan mes tokante tur sorto di asuntunan di labor. Aparte di un kantidat grandi di empresanan, e públiko por spera tambe presensia di diferente organisashonnan perífero di merkado laboral ku tin un ròl kolaborativo òf fasilitativo, manera instruktornan i partidonan ku ta brinda oportunidatnan riba tereno empresarial. Sinembargo, e funshon di empresario tambe ta un funshon laboral ku mas i mas ta ser menshoná pa buskadónan di trabou komo un ‘posibilidat real’. Durante e Caribbean Job Fair e bishitantenan tambe por pasa na e marshe di presupuesto kaminda nan lo ser informá tokante kon pa manehá sèn na un manera konsiente i posibilidatnan pa ekonomisá, pero tambe kon pa manehá nan entrada nèto di un forma korekto,  kon pa spar di un forma inteligente i kiko por hasi ora ku tin debe. Klupnan di servisio tambe lo ta presente pa reklutá tantu miembronan nobo komo futuro lidernan. Klupnan di servisio ta duna un aporte enorme na nos komunidat i ta forma un bon base di entrada riba merkado laboral ya ku nan ta kasnan di kultivo pa talento. E propósito di e evento akí ta pa trese tur partidonan, dunadó- i buskadónan di trabou, entidatnan i instansianan huntu den un ambiente relahá. Dor di ofresé e oportunidat pa kontakto direkto nos ta garantisá ku tantu e empresanan komo e bishitantenan por sera konosí ku otro personalmente, hasiendo e evento akí pa ambos partido e komienso perfekto di un relashon struktural i balioso. E evento lo tuma lugá na Universidat di Kòrsou i e empresanan partisipante por hür stèntnan di diferente tamaño. Tambe ta eksistí e posibilidat pa tene presentashonan empresarial òf tayernan dirigí riba sierto fishi òf karera. Relashoná ku esaki a reservá algun salanan i klasnan. E Caribbean Job Fair ta habri ku un seminario ku un diskushon di pènel kaminda diferente oradónan lo duna nan vishon riba talento i e desaroyonan riba merkado laboral, hasiendo uso di e investigashon hasí pa Caribbean Job Fair. E seminario ta aksesibel pa tur hende i lo tuma lugá den e oula di universidat. Bo ta deseá mas informashon? Tuma kontakto ku nos na number di telefòn: 737-2025 òf via e-mail: info@caribjobfair.com. Tambe bo por bishitá nos wèpsait: www.caribjobfair.com òf nos página di Facebook: www.facebook.com/caribjobfair