Cu presentacion di Olga Tañon, Gilberto Santa Rosa, Jose Alberto “El Canario” y mucho mas…

WILLEMSTAD, Corsou:  Tabata den luna di december 2014 cu SHOWBIZZ International BV a lansa e proyecto “Concierto Viva la Música Latina Curaçao 2015”. For di dia cu a lansa e proyecto ya por a tuma nota di hopi expectativa. Awòki cu ta practicamente na clausura di e temporada di carnaval tur atencion ta wordo dirigi riba locual ta bay tuma lugar den luna di Mei proximo. Mientras e organisacion ta pendiente pa un conferencia di prensa na Aruba, ta cuminsa adelanta algun detaye. E nomber ta papia pa su mes. Riba dianan 29 y 30 di Mei proximo lo tin un explosion di Música Latina na Corsou ora no menos cu 7 artista/agrupacion musical presenta na Corsou reparti den dos anochi. Ta trata aki di artista y agrupashonnan musical di taya. Fanatikonan di musica latino lo bay keda encanta. Riba diabierna dia 29 di Mei proximo lo tin presentacion di Gilberto Santa Rosa, Grupo Guaco de Venezuela y Jorge Celedón. Riba diasabra dia 30 di Mei lo tin presentacion di Olga Tañón, El Gran Combo de Puerto Rico, José Alberto El Canario y Alberto Barros.  Tur artista lo duna nan presentacion riba e mesun escenario, pues realmente ta trata di un gran concierto. E concierto ta cuminsa 7:30PM riba ambos anochi. Di acuerdo cu Showbizz International, “Nos lo tin un solo escenario y publico lo disfruta di cada un di e conciertonan sin perde niun piesa. Pues e echo cu ta un solo stage ta bay arma, ta duna e garantia cu lo bo no perde nada di e 7 agrupashonnan cu lo tey pa e dos anochinan di concierto. Ta construi un stage enorme, suficientemente grandi pa garantisa cambio rapido di un agrupacion pa otro, mei ora entre cada banda”. Massive Sound cu amplio conocemento y experiencia di otro concierto y festival na Corsou lo ta encarga cu zonido, luz y ‘rider’ di cada artista. “Concierto Viva la Música Latina Curaçao 2015” lo tuma lugar riba e parkinglot di SAMBIL Curaçao. Un tereno completamente asfalta, hancho, pues cu masha hopi espacio. Lo ta e prome evento grandi cu lo tuma luga na SAMBIL Curaçao. Na unda cu SAMBIL Curaçao ta situa, ta un punto strategico, facil pa yega na dje y loke ta masha importante: posibilidad pa staciona bo auto riba e mes tereno cu e concierto ta. Entrada pa e concierto ta Naf 200 pa un anochi i Naf 350 pa ambos anochi. Consulta bo agencia di biahe faborito y puntra pa un pakete inclusivo bo estadia. Por haci mencion cu carchinan ya caba ta na benta pa fanatikonan internacional/ den region cu ta pendiente pa bishita e concierto aki den luna di Mei proximo. Cumpra bo carchi ‘online’ via di www.ticketscaribbean.com pues hopi facil pa e fanatico cu ta residensiá den exterior. Ta premira un gran cantidad di fanatico for di Aruba i Boneiru, sin lubida Isla Ariba i Surnam. Por cumpra carchi ‘online’ pa e mesun preis cu ta wordo bendi localmente Naf 200 / $115 pa un anochi of Naf 350 / $200 pa tur dos anochi. Adkisicion di e carchi ta hopi facil; paga, print e-ticket y bin cu n’e riba e anochinan di concierto. Pa mas informacion tocante di Viva La Musica Latina por bishita e pagina di Facebook of por yama +5999 737.2025 ext. 135. Keda pendiente pa algun campaña interesante riba e pagina di Facebook di Viva La Musica Latina.