ORANJESTAD, Aruba – 13 di mei 2016: James Hepple, C.E.O. di AHATA a comenta awe tocante e proposicion di Ministro di Turismo pa introduci un ley pa regula benta di pakete all-inclusive door di e hotelnan na Aruba. “Ademas di tur e cuestionnan di principio pa loke ta hacimento di cambio inhustifica na permit di hotel existente, e cos cu nos no por compronde ta cu Ministro ta parce di ta sinti cu, restringiendo e cantidad di pakete all-inclusive bendi na bishitante, e ora ey di un manera magico Aruba lo atrae mas bishitante cu no kier pakete all-inclusive.”

Di acuerdo cu James Hepple “E contrario lo sosode. Tin mas cu suficiente camber di hotel tradicional, e unico cos cu lo sosode, restringiendo un aumento den e cantidad di camber cu por bende como all-inclusive, ta cu e huespednan cu tabata desea pakete all-inclusive simplemente lo bay un otro luga y lo no bende e camber di hotel tradicional. Con esaki ta yuda economia, simplemente mi no sa”.

Mas leu e C.E.O. di AHATA a sigura cu “Si nos tira un bista riba mercado en general, e segmento di all-inclusive ta provee hopi empleo y actividad den nos economia, frecuentemente na un nivel mucho mas halto cu otro segmento di e economia turistico local”.