‘Eat Local Aruba’ na Renaissance Aruba Resort & Casino

ORANJESTAD– September – Cuminsando dia prome di october proximo, lo tin un luna completo di ‘Eat Local Aruba’. Un evento gastronomico anual cu ta ofrece platonan local na un ‘fixed price’. Meta di e luna culinario ta pa mas hopi hende experencia restaurantnan local. Renaissance Aruba Resort & Casino tambe ta join Aruba Restaurant Month; esaki ta e luna perfecto pa disfruta di un plato na Aquarius y L.G. Smith’s Steak & Chop House situa den Renaissance Mall of Fresco Restaurant situa na Renaissance Ocean Suites.

Cada menu a wordo prepara cu e identidad Arubiano den mente creando asina un menu varia y na gusto di un y tur. Aquarius lo ofrece un dinner buffet pa solamente $30 cu lo consisti di un sopi di dia, e ‘catch of the day’ cu su acostumbrado funchi, un ‘Steamed Seafood Bar’, seleccion amplio di salada y por ultimo un ‘Dessert Buffet’ prepara tur dia fresh na Aquarius su pastry shop.

Fresco Restaurant lo bay tin un dinner buffet ‘Crioyo’ tambe pa solamente $30 cu lo consisti di platonan tipico Arubiano. Disfruta di un Calco Stoba, Balchi Pisca, Keshi Yena of un Galiña den curry, tur esaki y mas acompaña pa un Balashi, Chill of un Aruba Ariba Cocktail.

Pa dinner un tiki mas elegante, pero cu un prijs special, L.G. Smith’s Steak & Chop House a prepara un ‘three course’ dinner menu consistiendo di opcionnan den aperitivo for di ‘Onion Soup’, ‘Caesar Salad’ of e ‘Crispy Pork Belly’. Como entrada por scoge for di un ‘6oz. Ladies Cut from The Grill’, ‘Sous Vide Grouper, Shrimp & Clams’ of e ‘Grilled Spring Chicken’. Por ultimo por scoge entre un ‘Crème Brulee’ tradicional of e tan gusta ‘Apple Pie a la Mode’ -como dessert. E ‘three course’ dinner aki lo bay pa e prijs special di $40.

Renaissance Aruba Resort & Casino ta invita Aruba pa haci uzo di e ‘Eat Local Aruba’ special; tur tres restaurant ta participante oficial di Aruba Restaurant Month. Mirando e exito di aña pasa, ta recomenda pa haci reservacion trempan yamando 523-6195.