Den kuadro di selebrashon di su 65 aña di eksistensha, riba djadumingu 16 di novèmber próksimo, Prinses Wilhelmina Fonds ta organisá un intersante simposio ku partisipashon di diferente speshalista den diferente ramo. Durante e simposio lo trata e diferente aspektonan di kanser tantu serka hende muhé komo hende hòmber, manera entre otro detekshon di e malesa di kanser, e diferente tipo di tratamentu di kanser, operashon, radioterapia, e importansha di guia siko sosial, e impakto ku kanser por tin serka un famia, kon siña biba ku kanser i tambe kon pa prevení e malesa. Pues Direktiva di PWF, un biaha mas a sòru pa hinka un programa hopi interesante den otro ku ta konta ku respaldo di un grupo grandi di speshalista manera entre otro, drs. Franke Scheper (internista/onkólogo), drs. Lisette Brigitha-de Lannoy (médiko di famia), drs. Paul Ackerman (sirujano), Dr. Patrick Fa-Si-Oen, Ph.D. (sirujano), drs. Michael Samson (radioterapista), Dr. Wissem Isa, Ph.D. (urólogo), Dr. Igor Gomes Bravio (ginekólogo), drs. Jacques Capello (ginekólogo/seksólogo), Dr. Alexander Saleh, Ph.D. (internista/gastro-enterólogo), Prof. Dr. Bob Pinedo (internista/onkólogo, ganadó di e prestigioso David A. Karnofski Award 2014), ku presensia di varios otro presentadó mas. E simposio ta tuma lugá den Sala di Ekshibishon di World Trade Center kuminsando 9’or di mainta pa 4’or di atardi. Durante e pousa di mèrdia lo tin un lunch opsekio di Prinses Wilhelmina Fonds. Manera semper ku tur aktividat di Prinses Wilhelmina Fonds, partisipashon na e simposio aki ta grátis. Personanan interesá por pasa buska nan karchi di partisipashon na entre otro ofisina di PWF na Skalo, Botika Brievengat, Botika Santa Rosa, Albert Heyn, Mensing’s Caminada, MEDENFIS, SVB, Baskin Robbins Santa Maria i Saliña, Fundashon Prevenshon, Poli Oncologie, Advent Ziekenhuis òf Klinika Dr. Taams. Buska bo karchi tempran, pa konfirmá bo partisipashon. No kabe duda ku e lo bira un simposio hopi importante, ku informashon hopi balioso pa nos tur. Pues kòrda buska bo ticket di entrada gratuitamente na un di e lokalidatnan menshoná anteriormente.

SELEBRASHON MISA INTER-RELIGIOSO

Banda di e simposio, komo parti di selebrashon di su 65 aña di eksistensia, riba djaluna 10 di novèmber PWF lo tin tambe un misa interreliogoso, na kua lo partisipá diferente representante di diferente iglesia di nos pais. E misa aki ta tuma lugá na Misa di Brievengat kuminsando 7’or di anochi. Prinses Wilhelmina Fonds, ke invitá tur pashènt i nan famia, i di mes henter komunidat pa bin selebrá e hecho aki huntu. Ta un bon momentu pa huntu mustra nos union i solidaridat pa e lucha kontra di kanser. Pa mas informashon tokante e simposio i tambe e Misa Inter-Religioso por yama ofisina di Prinses Wilhelmina Fonds na telefòn 461-1998.