Den su afan pa amplia su servisio na e personanan ku ta bishitá su Sentro situá na Skalo, dia 25 di ougùstùs Prinses Wilhelmina Fonds a inougurá ofishalmente su “Skina di Mucha”. Ta trata di un huki speshal ku a keda kreá pa e muchanan di su Kinderkankerfonds, pero tambe komo un espasio di rekreashon i dibertishon pa e muchanan di kua e mayornan ta bishitá Prinses Wilhelmina Fonds pa buska informashon òf pa konsulta serka e trahadónan sosial di Prinses Wilhelmina Fonds. Durante e oranan aki, e mayornan por hasi nan diligensia trankil, miéntras e muchanan por dibertí den e skina di mucha. E espasio ta hopi kolorido kaminda e muchanan por sinta traha pùzel, pinta, klùr, tambe nan tin un tablet na nan disposishon òf simplemente sinta wak televishon.

E proyekto di “Skina di Mucha” a bira realidat danki na inisiativa di nos Miss Teenage Kòrsou 2015 Titiana Curie, ku komo parti di e proyekto komunitario pa su preparashon pa e sertámen, a enkargá su mes pa kuminsá ku un skina pa mucha pa PWF su kinderkankerfonds. Gerensia di di PWF ta hopi agradesido pa e bunita inisiativa aki, ta p’esei ke yama nos Miss Teenage Kòrsou 2015 Titiana Curie masha danki pa e gran proyekto aki.

Durante di e mainta aki, presentenan a konta tambe ku presensia di señor Lio Capriles, kende a regalá un kuadro masha speshal na PWF su “Huki di Mucha”. Direktiva di Prinses Wilhelmina Fonds ke yama señor Capriles i su famia hopi danki pa e gesto bunita aki.