E restourashon i rehabilitashon di e asina yamá “Kas di Plan Mulina” na Otrobanda a keda finalisá ainda mas lihé ku e kabesantenan di e proyekto akí a spera. Despues di kada un di nan bishitanan na e edifisio ku tabata den su restourashon, e direktora Louise Elstak i e presidente Bob Pinedo di Fundashon Prevenshon nan dos a bin kaba di realisá nan mes di e beyesa arkitektóniko di e monumento akí. Awe e restourashon finalmente   a keda kla. Anto tur esaki dentro di e término di tempu palabrá i kombení.

Ta trata akí di un di e edifisionan ku mas ta resaltá i tambe ta destaká pa su beyesa úniko den Karibe ku ta bai bèk for di aña 1750. Ta reina un alegría i un orguyo debí na e echo ku e Sentro di Prevenshon di Fundashon Karibense ‘Caribbean Prevention Center’ di Fundashon Prevenshon ta situá den e edifiio akí. Dia di e inougurashon lo wordu realisá pa Minister Suzy  Römer, esaki tambe ta enserá e momento kulminante for di e regreso di dòkter Bob Pinedo pa su isla natal Kòrsou dies aña pasá. Direktiva di Fundashon Prevenshon ta sumamente gradesidu pa e esfuersonan sin presedente di Fundashon Bon Intenshon durante e restourashon, i tambe pa e gesto grandioso di e fundashon akí pa fasilitá e edifisio akí na Fundashon Prevenshon gratuito, miéntras ku i durante e tempu ku Caribbean Prevention Center ta den operashon i ofresiendo su servisionan na pueblo di Kòrsou i na henter e región di nos.

E edifsiio ta brinda lugá i espasio pa inisiativanan nobo, loke sin ningun duda tin e bendishon di señor Lio Capriles, promotor di Fundashon Prevenshon.

Den e edificio nobo akí tin den e Ala Wèst e ekiponan di i pa realisá  mamografia, ku ta konsistí di un aparato konvenshonal i tambe un aparato ku ta disponé di fasilidatnan  3D, un donashon ku Rotary Club a realisá últimamente na Fundashon Prevenshon. Tin además di tur esakinan kambernan agradabel i simpátiko pa e skrinmentu tempran di enfermedatnan, manera kánser servikouterino i, posteriormente, kánser na tripa i gloukuma. E programanan nobo ta den e etapa di pleno desaroyo.

Gerensia i henter e ekipo atministrativo ta situá na promé piso. Lo ta realmente un alivio i un paso di efisiensia, ku awor nan ta huntu i ku nan no tin nodi di traha na lokalidatnan distinto. Esaki tabata e kaso anteriormente, tempu nan tabata situá den Klipstraat, tambe e radiólogonan lo tin atrobe un espasio pa nan mes.                                                                                                  Por último, den futuro e personal por retirá pa nan kome nan kuminda di mèrdia den un komedor, ku sufisiente stul pa nan tur por sinta trankil. E resepshon di e klientenan lo ta agradabel na ‘Kas di plan Mulina’, ya ku tin sufisiente lugá di parker, miéntras ku e terminal/stanplats di konvoi ta keda na algun paso for di e sentro di prevenshon.

Caribbean Prevention Center (Sentro di Prevenshon Karibeño) ta un primisia den materia di Prevenshon di Malesa, kaminda tin tur resultado sentralisá di enkuestanan hasí den un organisashon so.

Finalmente, presidente Bob Pinedo kier a gradisí señor Jacob Gelt Dekker, ku a pone su edifisio den Klipstraat durante dies aña pòrnada na  disposishon di Fundashon Prevenshon.