WILLEMSTAD- Desde su apertura The Cinemas a bira e gran faborito pa tur fanátiko di sine. Un sentimentu realmente kaluroso, un sitio familiar i naturalmente un dushi ambiente pa tur ku ta deseá di inkluí The Cinemas den nan ‘date night’. Awòki, ta klá pa un inovashon mas den mundu di pelíkula lokal. Manera semper komo ‘trendsetter’, The Cinemas a bin ta hasi baimentu di pelíkula masha plasentero; for di 11 di yüni ta introdusí 4D na THE CINEMAS!
Kòrsou lo ta e promé pa risibí stulnan 4D den Sentroamérika. Ku esaki, e bishitante di The Cinemas ta sumergí na un eksperensia sensashonal. Tur 4 sentido lo wòrdu ‘kishikí’. E bishitante ta mira e pelíkula den 2D òf den 3D i lo sinti no ménos ku 15 diferente efekto ku lo wòrdu generá ku bientu, awa, holó, lus, moveshon- hasta e por sinti algu mishi kuné. Mayoria di e efektonan aki ta bin for di e stul mes, algun for di den plafòn i otronan for di e parti dilanti di e sala. Bai un pelíkula, lo no ta algu komun mas. ‘Jurassic World’ lo ta e promé pelíkula ku lo keda estrená den 4D.
Kisas algun konosé e eksperensia 4D dor di nan vakashon na parkenan di dibertishon manera Walt Disney World i Universal Studios. Awòki, tin tur esei na Kòrsou mes! The Cinemas, ta hasi lo máksimo pa sigui ofresé su bishitante un eksperensia sensashonal. E sala lo konta ku 64 stul 4D i ta inkluí tambe un pantaya estilo ‘wall-to- wall’ ku ta un i mèi mas grandi ku esun usual, tambe ta agregá un proyèkter nobo pa duna mas lus i asina intensifiká efektonan visual 3D.
15 efekto den 1 stul:
E stulnan ta super konfortabel- ta nan ta e ‘kurason’ di henter e eksperensia. Kada stul riba su mes ya kaba ta un aventura, produsiendo 15 efekto. Efektonan di awa ku bientu ta den forma di ‘air blast’ i ‘water blast’, tambe a hasi uso di un mashin pa produkshon di bientu. Pa kompletá e sentidonan tin ‘neck tickler’, ‘back poker’, ‘seat popper’, ‘rumbler’ i tambe ‘leg tickler’. Hasta e olfato ta wòrdu ‘kishikí’ ku diferente holó. Den e sala mes lo krea efektonan di klima manera bientu, áwaseru, sneu i mist. Un mashin pa krea ‘bubble’ i lusnan estroboskópiko lo kompletá e eksperensia 4D na The Cinemas.
Tokante ‘Jurassic World’: ‘See, Hear, Smell & Feel it’
E pelíkula ku The Cinemas lo usa pa estrená su 4D a wòrdu trahá na midi: e pelíkula nobo di Steven Spielberg ta un konhunto di esenanan eksitante i lo hisa e stándart den mundu di sine, sigur den The Cinemas 4D. E karchinan pa eksperensiá un pelíkula 4D lo kosta djis un tiki mas ku usual, pero ta sigur ku e bishitante lo risibí mucha mas balor pa su sèn. Algu inolvidabel. Den futuro lo presentá hopi mas pelíkula 4D i tambe algun pelíkula eksistente lo wòrdu presentá awó den 2D, 3D i 4D. The Cinemas ta introdusí un era nobo den mundu di sine na Kòrsou.