Pa mas ku 20 aña kaba (for di tempu di Setel), UTS, den estrecho koperashon ku KPMG (KPMG Dutch Caribbean & Suriname i KPMG Meijburg Caribbean), ta presentá e Buki di Telefòn na kuminsamentu di tur aña. KPMG semper a spònser e produkshon di e kaft, dunando esaki un tema ku ta biba den komunidat den e aña en kuestion, akompañá pa un diseño ku ta kuadra ku e tema. Nos buki di telefòn a para bira un parti di nos bida diario i tambe un parti indispensabel di e mobilario di kas i ofisinanan na Kòrsou. Te awe e ta un di e promé medionan ku un hende ta konsultá, ora ku e ta buská un otro persona, servisio òf instansha. Ansiosamente tur aña di nobo, komunidat di Kòrsou ta warda pa sa ki tópiko òf inovashon UTS i KPMG lo bin kuné pa loke ta trata e kaft di buki di telefon. Pa e tópiko di e aña aki, nos a bini ku un tremendo inisiativa, pa laga komunidat di Kòrsou, den e kaso aki hóbennan entre 12 pa 18 aña di tur skolnan sekundario, partisipá aktivamente den eskoho di e tema di buki di telefòn 2014 pa medio di un kampaña. Den temporada di mei i yüni aña pasa hóbennan a entrega nan tema interesante ku lo bai biba den nos komunidat den aña 2014 i motivá tambe nan eskoho. E kompetensia tabata basta fuerte ya ku entre otro 30 hóben a entrega nan tema. Finalmente e tema a wòrdu gana dor di Sharthy Maria, Sharthy tin 16 aña di edat i e ta bai MIL. Aña pasa nos a sorprendé komo ganadó di e kompetensia di Buki di Telefon 2014  i e la gana un Samsung Galaxy Tab 2 huntu ku servisio di UTS 4G+ pa un aña largu. Pues nos ta hopi orguyoso di por presentá e buki di telefon di 2014 ku su visualishon di e tema ku Sharthy a bin ku n’e. Nos ta sumamente orguyoso di por aportá dje forma aki na formashon di nos hóbennan, dor di duna nan tambe  e chèns pa demostrá nan talento i kreatividat. Di e manera aki nos ta kontribuí na forma hóbennan prepará, responsabel i útil pa nos komunidat. Mi ke invitá Sharthy bin dilanti pa splikanos kiko e tema ta enserá i kon e la kai riba e idea.