Den un esfera ameno i interesante, aya na e garashi di Apache Heavy Equipment, Grupo di Karnaval ‘Nos Tei i ‘Nos tambe Tei’ a duna informashon tokante nan tema karnavalesko ‘Orguyoso manera un Pòwis’ i alabes presentá nan trahenan karnavalesko pa e temporada di karnaval 2014. Un idea i kòmbersashon espontaneo despues di despedida di karnaval ku a krese i kristalisá den e grupo di karnaval ‘Nos tei’ i ‘Nos tambe Tei’. Durante temporada di karnaval e grupo lo gosa i baila bou di animashon musikal di dj Black. Pa loke ta trata partisipashon na marcha grandi e grupo ta ofrese dos sekshon, kual ta e sekshon adulto i e sekshon speshal pa studiante. Hóbennan ku tin e edat di 18 aña i ku ta studiando lo por forma parti den e sekshon speshal di grupo di karnaval ‘Nos Tei’ na un preis mas adekuá pa studiante. Lider di grupo, señora Dilza Casper, ta sumamente kontentu ku e echo ku nan esfuerso i nan aporte lo kontribuί na engrandesimentu di nos dushi karnaval. E grupo lo karakterisá su mes pa un grupo karga ku ambiente. Tur ku ta interesá den forma parti di e grupo aki por tuma kontakto mediante nos number di kontakto 528-1111 òf bishitando nos página Nos Tei/Nos tambe Tei riba “facebook”.