Willemstad – E promé edishon di Curaçao Ponton Festival lo kulminá den anochinan músikal ku presentashon di Morgan Heritage i ROCKPACK. Riba djasabra 7 di aprel, Sumusica Curaçao B.V. lo trese hopi ganadónan i nominádonan di premio ‘Grammy’ na Curaçao Ponton Festival.
E festival di músika di 3 dia, kual ta tuma lugá dia 5, 6 i 7 di aprel riba Brionplein i Kleine Werf, lo konsistí djasabra anochi di artistanan rekonosé internashonalmente den e mundu di reggae i rock. Bishitantenan di e festival ku ya a kumpra nan karchi, tin chèns di topa ku e íkononan Morgan Heritage i ROCKPACK durante un ‘Meet & Greet’. Morgan Heritage no ta un deskonosí den e mundu di reggae. Morgan Heritage, ku a kaba di kompletá su gira na Europa, tin hopi kantika konosí manera ‘Don’t Haffi Dread’, ‘Tell Me How Come’, ‘Down by the River’ i ‘She’s still Loving me’. Na 2016 e banda di famia a risibí un premio ‘Grammy’ pa mihó album di Reggae, ku nan album ‘Strictly Roots’. E aña aki Morgan Heritage a bolbe wòrdu nominá pa e mesun kategoria ku nan album Avrakedabra. Pa e album Avrakedabra, Morgan Heritage a traha ku diferente artista renombrá manera Ziggy Marley i Stephen Marley. Nan músika ta wòrdu identifiká ku mensahenan fuerte i un meskla di diferente estilo di músika manera ‘Roots Reggae’, R&B’, ‘Hip-Hop’ i ‘Dub-Step’.
E formashon músikal ROCKPACK tambe ta konsistí di legendarionan di rock ku lo presentá durante Curaçao Ponton Festival. E banda di rock ta konsistí di e tremendo artistanan Bill Champlin, John Elefante, Fran Cosmo, Kevin Chalfant i Alex Ligertwood. Bill Champlin ta un kantante, gitarista, tokadó di ‘keyboard’, areglista, produktor i kompositor. Na 1980 e la wòrdu nominá pa premio ‘Grammy’ den e kategoria ‘Kantika di aña’ i ‘Mihó kantika di R&B’. Bill Champlin a risibí 2 premio ‘Grammy’ pa ‘Mihó kantika di R&B’ na aña 1980 i 1983. E artista multi talentoso ta spesialmente konosí komo kantante di e banda Chicago. Algun hit di Chicago ta ‘Hard Habit to Break’, ‘Look’ i ‘Hard to Say I’m Sorry’.
Alex Ligertwood ta un kantante, kitarista i drummer Eskoses, ken ta altamente konosí komo vokalista prinsipal di Santana. E banda di rock latino merikano a yega na eksito internashonal ku nan hitnan manera ‘Black Magic Woman’, ‘You Know That I Love You’ i ‘Oye Como Va’. E sobra integrantenan di e grupo, Fran Cosmo, Kevin Chalfant i John Elefante respektivamente ta èks kantante di e bandanan legendario di rock Boston, Journey i Kansas.