Willemstad, La Tentashon ta invitá pueblo di Kòrsou na La Tentashon Summerschool 2014 kual lo tuma lugá Djabièrnè 18 di yüli 8or di anochi. Di 14 pa 18 di yüli La Tentashon tabatin su Summerschool. Durante e siman aki e partisipantenan entre 4 pa 13 aña, a haña workshop di baile, kanto i aktuashon. Nan mester a traha riba un show ku tin komo tema prinsipal “Happy”. E workshopnan a wòrdu duna dor di Xemio Jacobs, Royston Hato ku tabata na enkargo di e parti musikal. Jessy Wall a traha un bunita baile ku nan i John Nagtegaal tabata e dosente di Aktuashon. Aparte di e Summerschool nos tabatin den e mes un siman tayer ku esnan mas grandi. E hóbennan di 14 pa 21 aña di edat a traha ku “ Nos Huntu Teater” Nos Huntu Teater ku ta konsistí di studiantenan for di e skol ArtEZ Arnhem- Hulanda. E grupo di studiante aki tabata tei aña pasa huntu ku Abigahie Pinedo, ex-studiante di La Tentashon Performing Arts Academy. Aña pasa e grupo di studiante aki a duna workshop durante Summerschool i alabes a traha un tremendo show ku a hiba e nòmber Aros Brua. E aña aki nan tabata tei bek pa traha ku 13 hóben ku lo presentá e mes un anochi ku Summerschool. La Tentashon ta invitá pueblo di Kòrsou pa bin disfrutá di e presentashon di e hóbennan ku a partisipá na La Tentashon Summerschool i The Creatures of Arnhem 2014. Karchi ta solamente Nalf.10,- i ta optenibel na takia di Teatro Luna Blou. Pa mas informashon yama Teatro Luna Blou 462-2209 òf por chek nos página wep: www.lunablou.com