… Dia 29 di ougùstùs próksimo …

WILLEMSTAD – Den kuadro di preparashon pa Curaçao North Sea Jazz Festival, Renaissance Curaçao Resort ta introdusí e promé edishon di Curaçao North Sea JAMZZ dia 29 di ougùstùs próksimo. Ophetivo di e proyekto musikal aki ta pa brinda pueblo di Kòrsou presentashonnan di artistanan internashonal pa añadí espektativa na e festival di mas grandi riba nos isla. E aña aki lo konta ku presentashon di e artista di internashonal Maite Hontelé, un trompetista salsero di taya!  

Nasé na Hulanda ku un kurason Colombiano, Maite Hontelé di 35 aña di edat a sá di postulá su mes haltu riba e lista di trompetistanan salsero internashonal. Via di e kolekshon di disko di su tata Maite Hontelé a sera konosí ku e género musikal di salsa. Na un edat hopi hóben e‘la siña toka tròmpèt i a profundisá su mes den un estudio di músika. Na 2009 Maite a saka su promé CD titulá ‘Llegó La Mona’ ku ta un dedikashon spesial na músika Colombiano. Tabata durante un presentashon na Medellin ku Maite a disidí ku e ta bai biba einan i sigui su karera musikal. Na sèptèmber di 2014 Maite su CD ‘Déjame Asi’ a wòrdu nominá pa un ‘Latin Grammy Award’. Miéntras ku su popularidat ketu bai kresiente den Latinoamérika Maite a bolbe bèk Hulanda den yüni di 2015 pa presentá su CD nobo ‘Voy A Querer’ ku ya ta un éksito rotundo.

Riba dia 29 di ougùstùs próksimo Kòrsou lo mira e gran artista aki riba esenario di e promé edishon di Curaçao North Sea JAMZZ. Pa kompletá e eksperensia lo tin presentashon di DJ Lu-C, DJ Paco, DJ Ro-1, Gino & Co., Gilmar Fraites, Hershel Rosario & Co., Junior Tecla, Perfect Fourth, Tumabo Curaçao i KY3 for di Venezuela. Lo tin presentashonnan entre 4:30PM i 12:30AM. Ta bon pa menshoná ku entrada pa Curaçao North Sea JAMZZ ta grátis. Sigui Renaissance Mall & Rif Fort su página riba Facebook pa mas informashon. Djasabra 29 di ougùstùs próksimo no pèrdè e promé edishon di Curaçao North Sea JAMZZ na Renaissance Mall i Rif Fort.