WILLEMSTAD — Relashoná ku Festival Un Kanto pa Kòrsou 2015 dediká na e gran baluarte Rignald Vidal, preparashonnan intensivo ta tumando lugá pa e evento aki bira un éksito total. Athunto e lista di e  partisipantenan. Durante di e konferensha di prensa e komishon organisadó a hasi un apelashon riba tur kompositor pa hasi mas uso posibel di nos ritmonan lokal. Por parte e kompositornan a kumpli, sinembargo algun dje komposishonnan a bira un kombinashon di Balada Seú. Tirando un bista riba e lista di kompositornan i intérpretenan, tin tur indikashon ku Festival Un Kanto pa Kòrsou 2015  ta bolbe konta ku komposishonnan na nivel haltu. Bou di e partisipantenan e biaha aki tin hasta un intérprete Boneriano ku ta bai interpretá un komposishon di Sylvana WIllems Trinidad

Djaluna próksimo dia 1 di yüni, e komishon organisadó di Un Kanto pa Kòrsou lo reuní ku tur kantante, kompositor i areglista pa asina ei splika tur último detaye di e organisashon. Pa loke ta trata e ensayonan ta kuminsá djadumingu dia 7 di yüni próksimo.

Manera ya ta konosí,  Festival Un Kanto pa Kòrsou 2015 lo tuma lugá djadumingu 14 di yüni pa 7:30 di anochi na Brekkeput Mei Mei. Ya karchinan ta optenibel na Beep Beep na Rio Canario, Pompstation Sta. Maria, Curaçao Festival Center i serka e partisipantenan.

E festival aki ta di gran importansia pa nos pais, ya ku e ta kontribuí ma un desaroyo musikal di nivel haltu i alabes e ta kontribuí na konstrukshon di nos pais. Esaki ta un dje motibunan prinsipal ku Gobièrnu di Kòrsou ta uni forma ku Instituto pa Formashon Musikal riba un base anual pa organisá e festival aki i mes ora produsí tambe kansionnan nobo, bunita i profundo ku ta kanta grandesa di nos dushi pais Kòrsou.