Willemstad – En konekshon ku Dia Internashonal di Boluntario, Curaçao Cares, a organisá e di tres edishon di e kampaña ‘Strea Boluntario’ pa rekonose i selebrá e trabou importante ku boluntarionan ta hasi inkansabelmente na benifisio di nos komunidat. Organisashonan sosial, di deporte, di bario i otronan ku ta konta ku sosten di boluntarionan a nominá nan streanan boluntario pa ser distinguí.

Nashonan Uní a instalá dia 5 di desèmber komo Dia Internashonal  di Boluntario, un dia ku mundialmente ta rekonosé i honra e trabou ku boluntarionan ta hasi.

Ku e kampaña di ‘Strea Boluntario’, Curaçao Cares kier duna organisashonan anualmente e oportunidat pa duna atenshon na boluntarionan den nan organisashon. Esaki ta di tres aña ku Curaçao Cares ta organisá e kampania aki. E prome aña nan a risibí 36 nominashon, e di dos aña 31 i e aña aki un totaal di 40 nominashon i por bisa ku kada nominado riba su mes ta un strea ku ta lusa nos komunidat. Un hurado di 5 persona a evaluá kada nominashon i a hasi e eskoho final di 3 Strea boluntario di aña 2016.

Komo un di tres ‘Strea Boluntario’ di 2016 a distinguí Sra. Marijke Pijpers ku a dediká su bida nan yuda  hende i animal. E ta un boluntario aktivo pa mas di 12 aña i tambe miembro di direktiva di Stichting Hopi Fuik. E ta laborando dia i anochi pa traha di su kas un sentro di aktividat digno pa habitantenan di bario di Fuik. E di dos distinshon a bai na Sr. Frendsel “Pappy” Lacruz ku ta entre otro, Alto Komisario di Scouting Antiano. Den kurso di añanan Frendsel tabata aktivo komo boluntario riba diferente puesto entre otro komo presidente, sekretario, trainer, lider di grupo i/òf komisario di distrikto den mas di 12 organisashon rònt Kòrsou. Finalmente a rekonosé Sr. Rudsel  “Beto” Albertoe ku ta duna di kurson komo boluntario di EHBO, pero tambe komo miembro di direktiva di Krus Korá Kòrsou. Tambe e ta duna bek na komunidat pa medio di su profeshon komo accountant. Den 3 diferente organsiashon e ta atministradó finansiero di kual unu ta Grupo di Scout Feliz Chacuto na Barber.

For di tur nominashon a skohé alabes dos persona pa duna un menshon honorabel. E eskoho a kai riba Sr. Reimundo Martina pa su kontribushon valioso na e dasaroyo di  hobennan di skol VSO Marieta Alberto (ZMLK) i Larissa de Haak – Bor ku ta un di e fundadónan di Ronald McDonalds House Charities (RMHC), tambe secretario i boluntario dediká na entre otro fundraising pa RMHC. Den kurso di desèmber Curaçao Cares lo kompratí atraves di diferente medio di komunikashon, e historia i motivashon di e personanan aki i di mas boluntario. Un danki ta bai na tur organisashon ku a hasi un nominashon. Un pabien i gradisimentu na tur boluntarionan rònt Kòrsou ku ta traha tur dia pa un Kòrsou prosperó.