Willemstad – En konekshon ku Dia Internashonal di Boluntario, Curaçao Cares a organisá e di dos kampaña di Strea Boluntario pa pone boluntarionan den ‘spòtlight’. Organisashonan sosial, di deporte, di bario i otronan ku ta konta ku sosten di boluntarionan a nominá nan streanan boluntario pa ser distinguí. Durante un atardi plasentero na Tula Room na Kura Hulanda a selebrá e trabou importante di boluntarionan i dunanan rekonosementu.

Nashonan Uní a instalá dia 5 di desèmber komo Dia Internashonal  di Boluntario, un dia ku mundialmente ta rekonosé i honra e trabou ku boluntarionan ta hasi. Ku e kampaña di Strea Boluntario, Curaçao Cares kier a duna organisashonan e oportunidat pa duna atenshon na boluntarionan. A risibí un total di 32 nominashon i por bisa ku kada nominashon sigur ta pa un strea ku ta bria. Un hurado di tres persona konsistiendo di atvisor di Samenwerkende Fondsen Sr. Etienne Ijs, Direktora di Stichting Johannes Bosco Sra. Roxanne de Leeuw i miembro di direktiva di Curaçao Cares Tanyah Curiel, a evaluá kada nominashon i a hasi e eskoho final. Dos persona a haña un Curaçao Cares speshal menshon pa e forma ku nan a kolaborá i sostené Curaçao Cares; esaki ta Sra. Geraldine Rodriguez di Plataforma Banda Bou i Frensley ‘Pempy’ Lucas.

For di tur nominashon a skohé 6 persona pa nombra komo Strea Boluntario di 2015. E eskoho a kai riba Sra. Rose Marie Ignacio pa su aporte inkansabel na bario i bisendario di Sta.Maria i en espeshal pa grandinan di e area. Tambe Sr. Ezequiel Calmes a ser honrá komo boluntario di mas ku 60 aña entre otro den Scouting. Sra. Agnes Apostel-Sylvester tin 40 aña ta dediká su mes na yuda mucha i famianan ku menos rekurso na Banda Bou, i ta organisá aktividat pa grandinan den e area. Ulvic Jamanika a ser distinguí pa su aporte di mas ku 15 aña na Karate Bond, kaminda e ta yuda ku diferente funshon i tarea. E hoben Derrick James tambe ta un Strea Boluntario pa su dedikashon pa yuda otro hobenan, i e manera ku ela destaká na Scouting, Brigada di Formashon i Seguridat i na Parokia Tera Kora. Sra.Editha Renardus tambe ta un Strea Boluntario pa e amor ku e ta kompartí ku klientenan di Fundashon Sonrisa, dunando nan lès di moveshon pa mas ku 15 aña.

Un danki ta bai na tur spònsor ku a yuda hasi e kampaña aki posibel, kual ta: Bearingpoint Caribbean, Maduro & Curiel’s Bank, Curaçao Airport Partners en FCW Legal. I tambe na Antengra Antillean Engraving, Margil Party Rental, Help’r en Tera Percussions ku a sostené ku diferente servisio. Naturalmente tambe un danki na tur organisashon ku a hasi un nominashon i na tur boluntario ku ta traha ku alma i kurason pa Kòrsou.