Willemstad – En konekshon ku Dia Internashonal di Boluntario, Curaçao Cares ku sosten di CIBC First Caribbean Bank, a organisá e kampaña di ‘Star Volunteer’ pa pone boluntarionan den ‘spòtlight’. Organisashonan sosial, di deporte, di bario i otronan ku ta konta ku sosten di boluntarionan a nominá nan streanan boluntario pa ser distinguí. Durante un atardi plasentero den kompania di Gobernadora di Kòrsou señora George-Wout a selebrá e trabou importante di boluntarionan. Nashonan Uní a instalá dia 5 di desèmber komo Dia Internashonal  di Boluntario, un dia ku mundialmente ta rekonosé i honra e trabou ku boluntarionan ta hasi. Ku e kampaña di ‘Star Volunteers’, Curaçao Cares kier a duna organisashonan e oportunidat pa duna atenshon na boluntarionan. A risibí un total di 36 nominashon i por bisa ku tur nominashon sigur ta para pa un strea ku ta bria. Un hurado di tres persona konsistiendo di kordinadó di Samenwerkende Fondsen, Sra. Marisela Flemming, Direktora di Stichting Johannes Bosco Sra. Roxanne de Leeuw i miembro di direktiva di Curaçao Cares Tanyah Curiel, a evaluá kada nominashon i a hasi e eskoho final. For di tur nominashon a skohé dos persona pa duna un menshon honorabel. E eskoho a kai riba Sra. Linuska Martina Bernadina pa su aporte inkansabel na bario i bisendario di Montaña i Lorain Sanchez ku ta un boluntario dediká ku ta sostené famianan na Ronald McDonald House asta durante dianan di fiesta. Komo e 3 ‘star volunteers’ di 2014 a distingui Sra. Ana Middelhof pa su 20 aña di servisio na grandinan di Betèsda kual e ta kuida tur siman. E di dos distinshon a bai na Sr. Jose Pinedoe komo miembro di VKC, Ban Yuda Komunidat i komo boluntario aktivo ku tin años ta pasa yuda na hopi kas di famia. Finalmente a rekonosé Sandra Hay ku durante 4 aña a laborá di dia i anochi pa por rekoudá mas ku 2 mion pa traha un edifisio nobo pa Mi Welita, un kas digno di nos grandinan. Un danki ta bai na CIBC First Caribbean Bank ku a patrosiná e kampaña, e sponsornan di e giftbags i tur organisashon ku a hasi un nominashon. Un pabien i gradisimentu na tur boluntarionan rònt Kòrsou ku ta traha tur dia pa un mihó Kòrsou.