ORANJESTAD, Aruba – November 2015: Post Aruba N.V. a emiti un serie nobo di stampia titula ‘Luganan Turistico 2015’. E serie ta consisti di 6 stampia di 250 cen, cu ta yega na un prijs total di Afl. 15,00 y e ta compaña pa su ‘envelop di prome dia di emision’  cu ta costa Afl. 16,50. E diseñonan (potret) pa e stampianan aki ta un creacion di Adolfo Valbuena y e stampianan ta imprimi na e Imprenta Estatal Austriaco. E serie di stampia ta obtenibel entrante 13 di november 2015 na e diferente oficinanan di Post Aruba, respectivamente na Oranjestad, San Nicolas, Sta. Cruz y Palm Beach Plaza Mall.

Faro di California

E faro di California na Aruba ta situa den vecindario di e beach na Arashi, un poco asina den direccion noordwest na e cabada di e isla. E ta construi cu e intencion originalmente pa tene e bapornan leu for di e costa di Caribe. E punta haltisimo aki di orientacion ta ofrece un historia rico y tambe e miho bistanan di e isla fascinante aki. E faro aki ta construi pa conmemora e bapor di palo ‘California’ , cu a zink na e costa di Aruba net meyanochi di 23 di september 1891 riba su ruta di Liverpool pa Central America.

E pasaheronan abordo tabatin un ‘fiesta tur afo’  na momento cu e barco a zink. Dos decada despues, un arkitecto Frances a diseña e edificio atractivo aki cu a bira conoci como e Faro di California. E construccion di e faro a cuminsa na 1914 y a finalisa dos aña despues. Ora di construccion nan a haci uzo di piedranan den e vecindario cu nan a corta. E parti ariba, cu un largura di 100 pia, tabata consisti di metal y den dje tabatin un luz cu ta cende y ta manda claridad riba e paisahe, manera ta e caso te dia di awe.

Mescos cu un potret perfecto di un punta di orientacion cu ta resalta ariba lama, asina e faro di piedra bieu aki a bira un di e puntanan di orientacion mas conoci na Aruba. For di su sitio faborabel aki, a resulta masha apropia pa saca potret di bistanan di e costa west di e isla cu su santo blanco, e costa cu su barancanan y tambe Tierra del Sol, e cancha di golf masha popular. E faro ta situa na e sitio Hudishibana, na unda esunnan mas atrevido tin tendencia pa test nan habilidad di surf den e santo blanco di e duin na California.              

E kapel di Alto Vista, un di e kapelnan mas bieu y mistico. E kapel ta construi na 1952 na e sitio original unda e prome misa catolico a keda construi na 1750 pa e misionero Spaño Domingo Antonio Silvestre. Bo ta yega na e kapel color geel briyante, ora bo sigui un caminda yen di birada y na cada banda e cruznan blanco cu ta indica ‘e caminda di cruz’. E ta un luga trankil na unda bo por reflexiona y unda paz ta reina . E ta rondona pa e paisahe di campo.

E mina di oro na Bushiribana

Di 1814 te 1915 diferente compania tabata busca oro na Aruba. E ruina cu a keda atras na Bushiribana tabata di Aruba Island Gold Mining Company. E edificio cu nan a construi na 1872, a sirbi como luga pa smelt oro for di 1872 te cu 1899. Aki ta unda nan a procesa miyones di liber di oro durante e ‘kentura di oro’ den siglo 19 na Aruba. Despues cu Aruba Island Gold Mining Company a bandona e isla, e edficio a cay den man di otro companianan cu ta smelt oro. E ultimo compania cu a haci uzo di e luga aki ta Aruba Gold Concession Ltd., cu a bandona Bushiribana na 1899. E ruina di mina di oro na Bushirabana ta accesibel pa publico.

E barancanan di Ayo

Pa un isla cu ta relativamente plat y cu hopi santo, e presencia di biaha asina di seronan chikito y barancanan grandi monolitico tur plama den campo y cunucu, ta un berdadero misterio. E remarcabel formacionnan geologico aki ta contribui na e parti estetico di e paisahe y ta percura alabes pa for di e sitionan halto aki adecuadamente bo tin miho bista riba e isla.

E formacion di piedranan gigantesco na Ayo, cu ta asina cerca di otro den formanan masha peculiar, combina cu e medio ambiente trankil di Ayo, ta crea respet y comprension pakico un tempo e habitantenan autoctono di e isla, esta e Arawaknan,  tabata considera e area aki como un luga sagrado.

Na e sitio aki tin e pinturanan riba e barancanan cu ta data for di miles di aña pasa, na unda ta parce manera ta un gigante cu ta cana rond a colecta e piedranan enorme aki comosifuera ta kiniki nan ta. Awendia tin caminda moderno traha pa asina yuda e bishitante explora e luga historico aki mas miho.

Waf pa bapornan crucero

E waf di Aruba, cu  actualmente ta e waf comercial di mas importante di Aruba, ta situa na zuidwest di e isla. E waf ta habri di dia y anochi, pa asina e bapornan por drenta y sali na cada momento. E ta situa na e parti canto di awa di e capital Oranjestad, cu ta duna un bista masha colorido asina cu e bapornan drenta waf. E bapornan ta mara dentro di un distancia cu bo por cana bay na e  centronan comercial, of sea bo ta core cu auto pa yega na e beachnan den 10 minuut, mientras e posibilidad t’ey tambe cu den un distancia di djis algo mas cu 2 miya, bo ta yega na e aeropuerto internacional. E waf pa bapornan crucero ta yama bonbini na miles di bishitante. Semanalmente nos waf ta ricibi bishita di bapornan masha impresionante. E turistanan cu nan ta trece, semper ta masha ansioso pa cera conoci cu e cultura y bunitesa di e isla.

Caya principal

Caya principal of Caya grandi (miho conoci como Caya G.F. Betico Croes), ta e prome caya comercial cu un variedad di sitionan cultural cu ta pega na otro na cualkier skina, pa asina ofrece un experencia unico y ameno pa haci compras. Caya principal tin disponibilidad di un variedad amplio di tienda pa comercio por menor, clasifica for di joyerianan famoso internacionalmente, ‘haute-couture boutiques’ y tiendanan cu marcanan renombra, te na kiosconan cu ta bende productonan local masha atractivo.

Cerca ey mes, ta keda e centro comercial Renaissance cu ta e luga apropia pa productonan di marca renombra. E luga aki tambe ta brinda un surtido amplio di restaurant y alternativa pa diberticion. Na e otro banda di e centro comercial bo ta haya Plasa Daniel Leo rondona pa edificionan Hulandes colonial masha colorido na unda tambe tin diferente joyeria y tienda di perfume como atraccion special.

Tur fin di november tin tur siman den Caya principal, pa ser exacto riba diaranson, un nochi cultural festivo, cu musica bibo di e artistanan local. E anochinan di compras durante ocasionnan special ta ofrece un oportunidad excelente pa bo tambe ta memey di e hendenan local cu ta cana rond cu nan famia! Recientemente e tram a bira e anfitrion principal di e Caya G.F. Betico Croes  pa e localnan  y turistanan.

Pa mas informacion tocante e stampianan ‘Luganan Turistico 2015’ por tuma contacto cu Departamento Filatelico di Post Aruba N.V., cu ta situa na J.E. Irausquinplein 9, Oranjestad, cu su number di telefon 528-7678, of bishita su pagina di Facebook Aruba Stamps.