Un bishita na tur cas di Aruba

ORANJESTAD, Aruba –  16 di februari 2016: Manera ta un tradicion, e aña aki atrobe Post Aruba N.V. ta encarga pa parti tur buki di telefon nobo di Setar na tur cas na Aruba. Diasabra e scooternan y autonan di Post Aruba N.V. a sali for di 6:00am caba y a keda traha te cu 6:00pm. Durante 12 ora largo a logra parti e gran mayoria di e bukinan di telefon.

Claro cu e trabou aki ta diferente pasobra un buki di telefon ta mas pisa cu un carta y ta tuma mas espacio den auto of pa maniobra cune riba scooter.

Riba e foto adhunto por aprecia Jason Bandfield di Post Aruba N.V. diasabra ultimo entregando e buki di telefon nobo na habitante di Boroncana # 3-C na Noord. Asina mayoria di e partidonan di carta a pasa cas pa cas, pa entrega tur e bukinan di telefon nobo di aña 2016. Pa Post Aruba N.V. ta un placer pa parti e bukinan di telefon y ta gradici Setar N.V. pa e confiansa y sosten di semper.