Willemstad – Curaçao Airport Partners huntu ku Polis i PoliTur a uni den un akshon kontra transporte ilegal na aeropuerto di Kòrsou. Djabièrne mainta i atardi a kontrolá esnan ku tabata ofresé biahero servisio di transporte pa i for di aeropuerto i a parti but na shòfur di diferente tipo di transporte klandestino, ku por ehèmpel no tabatin e papelnan adekuá òf e outorisashon pa por a transportá biahero riba e ruta di aeropuerto. Un biahero mester por konta riba transporte pa i for di aeropuerto ku ta safe, strukturá, uniforme i segun e ekspektativanan di hospitalidat establesé den indústria di turismo. Pa medio di akshonnan kontra transporte klandestino mester logra demotivá esnan ku ta ofresé e servisio aki sin e outorisashonan adekuá. Menos transporte klandestino ta mehorá e esfera i e fluho di tráfiko, kual lo añadí positivamente na e eksperensha di tantu e biahero komo esnan ku ta gana nan pan na aeropuerto.  E kolaborashon entre Polis, PoliTur i Curaçao Airport Partners (CAP) kontra transporte ilegal lo sigui tuma lugá ku mas frekuensha. Tambe CAP ta den proseso pa implementá instrukshonnan pa krea mas klaridat i uniformidat pa ku e servisio ku ta wòrdu ofresé na aeropuerto dor di transporte ku si ta outorisá i lo introdusí sticker pa taksi i tourbus kual lo hasi nan mas rekonosibel pa e biahero.