Minister Oduber hopi satisfecho cu henter e desaroyo pa San Nicolas

E trabounan di restauracion di Watertoren a finalisa algun tempo atras caba, despues di a pasa den un trayecto basta largo.  Ta momento pa pone esaki den funcion na momento cu otro edificio historico, Nicolaas Store, tambe ta kedando cla. Minister Otmar Oduber, Minister di Cultura tabata di bishita na San Nicolas y a topa Sr. Pieter Siebinga kende ta director di Nacionaal Restauratiefonds di Hulanda cu ta na Aruba actualmente riba vakantie y a dicidi di haci bishita na e proyectonan cu a financia Aruba. E mandatario a expresa di ta hopi contento di bishita di Sr. Siebinga, kende a duna Aruba hopi bon cooperacion cu fondonan adicional pa Monumentenfonds, pero tambe e ayudo tecnico pa haci Monumentenfonds un miho fundacion den e area cu e ta funciona. E Director por a mira e proyectonan cu a wordo restaura, pa e ta testigo di kico Aruba ta haci cu e fondonan cu a wordo otorga na Monumentenfonds. Tanto Watertoren como Nicolaas Store a beneficia di e ayudo cu a wordo ricibi for di Nacionaal Restauratiefonds di Hulanda. Recientemente Aruba a logra convence e fondo Hulandes aki pa un biaha mas financia Monumentenfonds di Aruba cu 1.2 miyon florin (adicional), cu ta haci posibel cu Aruba por sigui mantene y restaura edificionan historico. “Mi ta hopi contento cu bishita di Sr. Siebinga cu ta acompaña pa su señora y apesar cu nan ta di vacacion a dicidi di acepta e invitacion pa bini Aruba.” Den cuadro di bishita di Siebinga, Minister Otmar Oduber a pone un team traha pa duna un presentacion di tur loke cu ta tumando luga den area di San Nicolas riba tereno di museo y monumentonan. Minister Oduber ta indica cu ta henter un transformacion total di e experiencia ta creando pa un economia cu ta bay wordo incentiva cerca e hendenan pariba di brug. “Na momento cu busnan di tour cuminsa yega na San Nicolas pa tur e variedad di refreskerianan of restaurantnan cu lo wordo crea den e ambiente di cultura y artistico cu lo wordo crea na San Nicolas, lo sinti un cambio den e area aki. Ta hopi duro e team ta trahando pa logra cu na september awor por cuminsa ofrece turistanan un producto nobo den curason di San Nicolas.” E mandatario ta comparti.

E vision aki ta algo cu a cuminsa 4 aña pasa, ora cu el a bishita New Orleans cu un grupo di comerciante. Despues di esey, Minister Oduber a tuma su tempo pa convence e hendenan di e vision cu e tabatin pa San Nicolas. Mester convence e comunidad rond prome y poco-poco a haya reaccion. “Hopi aña a priminti San Nicolas. Hopi aña a papia di diversifica economia, di crea mas posibilidad pa San Nicolas. Loke nos ta haciendo aworaki, niun hende ta imagina ainda e efecto cu e ta bay tin pa futuro, cu esaki por atrae turista na cantidad pa pariba di brug. Carubbian tabata simplemente un tiki di loke ta bay tin den futuro, Minister Oduber a splica. Den cuadro di e vision pa San Nicolas, ya caba ATA a cuminsa cu mercadeo pa hiba e hendenan San Nicolas, cu na su turno lo trece mas inversionista den e area aki. Pronto lo tin dos restaurant cu lo habri nan porta den Promenade tambe.  Di otro banda, e prome fase di renobacion di e caya principal di San Nicolas ta finalisando y e plan pa di dos fase a wordo manda pa DOW y ta cuminsa cu e trabounan aki na inicio di otro aña.