Tin be nos tin ku tuma un pousa i realisá kuantu kos nos a logra. Ta bon pa nos ta konsiente di tur e desafionan ku nos a vense, e progreso ku nos a logra i SELEBRÁ! “Cheers To Success” ta un selebrashon ku ta honra e logronan di negoshinan eksitoso i esnan hasiendo esfuerso pa bira eksitoso. Komo oradó prinsipal lo presentá Minister di Desaroyo Ekonómiko Dr. Steven Martina i international business coach Sra. Nelida Cathalina. Cheers To Success lo tin un panel ku lo konsistí di: Billy Jonckheer, Daniel Hodge i Minister Steven Martina. E públiko presente por hasi pregunta i interkambiá ku e panelistanan tokante di oportunidat i desafionan pa empresarionan na Kòrsou. Tur bon selebrashon mester tin tremendo entertainment. Kantante i kompositor Naomi Silvanie lo duna un presentashon ku lo laga e públiko sinti un Dushi Feeling. I pa pone e cherry riba e bolo e violinista Arjen De Graaf, for di Hulanda, lo pone su alma i kurason den un presentashon ku hopi pashon. Arjen De Graaf ta un all-round violinista kual a studia Jazz, músika di North Indian i Baroque. Riba e anochi aki negoshi i plaser lo wòrdu perfektamente kombiná pa krea un anochi dibertí, produktivo i yena di inspirashon. Un di e metanan di Cheers To Success ta pa enkurashá i duna rekonosementu na kompanianan ku a bira eksitoso. Esaki ta importante pasobra ta rekerí hopi sakrifisio, esfuerso, dedikashon i konosementu pa por bira eksitoso. Dos kompania lo risibí e Cheers To Success achievement award pa Outstanding Thriving Business i Outstanding New Business. Tambe Cheers To Success ta ofresé algun kompania e oportunidat pa presentá nan negoshi i e solushon ku nan kompania ta ofresé.
“Despues di bishitá diferente networking events ma ripara ku tin nesesidat pa algu diferente. Un konsepto diferente kaminda hende ta dibertí, wòrdu inspirá, haña konosementu nobo i krea konekshonnan pero ku propósito,” segun Jeritsa Ignecia organisadó di e evento.
Cheers To Success ta un fundraising pa rekoudá fondo pa por produsí programanan di televishon edukativo i tambe dokumental. “Nos tin hopi programa di televishon ku ta enfatisá riba entretené pero poko ta edukativo. I dokumental lokal ta algu masha skars na Kòrsou. Media ta algu hopi poderoso. Nos tin ku hasi mas uso di dje pa eduká nos komunidat,” Jeritsa Ignecia ta bisa. Cheers To Success ta tuma lugá dia 1 di Sèptèmber na Papagayo Beach Club. No tin mas ticket disponibel, tur a wòrdu bendí manera pan kayente. Un danki ta bai na e sponsors Core N.V., FactorPlus, Licores Maduro, Papagayo Beach Club i Curaçao Afro Productions pa a yuda hasi e evento aki posibel. E públiko lo gosa di e momentonan pa konektá ku otro, presentashonnan inspirativo i e tremendo food and beverage ku Papagayo ta ofrese. Cheers To Success ta un anochi di selebrashon, plaser bon meresí i sekshonnan ku lo provoká amplia pensamentu. Bida ta kòrtiku. Ta momento pa hisa glas na laira i brinda pa bo éksito. Cheers To Success!