ORANJESTAD, Aruba – 25 di Maart 2018: E siman aki Amazing Reality a cuminsa cu un siman di conscientisacion pa hendenan special di Aruba, cual ta “Speciabilities Aruba 2018”. Durante henter e siman tin varios actividad y un di e actividadnan tabata na The Cinema. MetaCorp a haci posibel cu e personanan special por disfruta di un atardi ameno. Tur persona a mira e pelicula di Peter Rabbit y compaña pa popcorn y soft drinks.

Soren Richardson, director ehecutivo di Amazing Reality, haciendo esaki tabata algo adicional unda cu a saca e personanan special aki for di nan rutina, pasobra despues di scol sea nan ta bay cas of tra’i merdia. Un di e gruponan cu a presenta na The Cinema tabata Cas Sjabiruri, kendenan a tuma contacto cu Soren Richardson pa asina  tambe por participa na e actividad aki.

“Esaki tabata algo fantastico, pasobra nan a participa den nos caminata. Esaki ta algo extra pa nan sali for di e rutina di tur dia”, asina e la expresa. Un total di 30 persona special a presenta na The Cinema, di cual algun tabata cu nan mayornan of guia, y asina aki a yega na un total di 50 persona den e sala di The Cinema pa asina por a mira e pelicula asina Soren Richardson a expresa.

Amazing Reality a gradici The Cinema y specialmente Sr. Eddie de Veer, Devin de Veer y tur empleado cu a haci e atardi aki posibel y placentero pa tur presente. Pa siman nan largo Amazing Reality y The Cinemas a traha hunto pa por logra un atardi agradabel. “Esaki ta un comienso di un bunita cooperacion pa hopi aña pa e comunidad special na Aruba”.

MetaCorp y The Cinema tabata contento di por a ricibi e grupo di personanan special pa asina nan por a pasa disfruta di Peter Rabbit.