WILLEMSTAD:  Pizza Hut tambe a ‘habri su portanan’ bèk pa ‘delivery’. Klientenan por hasi pedido di nan pizza òf kualke otro plato riba menú di Pizza Hut via nan wèpsait nobo, i lo sòru di entregá esaki grátis. Gerensia di Pizza Hut ta suprayá ku medidanan di prevenshon i prekoushon ta vigente na tur momentu. Ademas, a reforsá tur protokòl di salú i higiena pa preparashon di kuminda. Gerensia ta skèrpi riba frekuensia ku ta laba man, uso di hanskun, i a oumentá limpiesa spesialmente riba e superfisienan ku ta risibí mas kontakto.

Pedido Online òf via WhatsApp!

Pizza Hut komo empresa tambe a bin ta hasi ahustenan pa tòg por sigui operá bou di e sirkunstansianan aktual. Durante di e ultimo simannan a bin ta desaroyá www.pizzahut.cw di manera ku klientenan por hasi nan pedidonan ‘online’ i tambe via WhatsApp +5999 4616161. E plataforma digital ta kompletamente outomatisá. Asina por menshoná ku unabes e kliente agregá e number den su lista di kontakto, e mester djis bisa ‘hi’, òf ‘order’ pa e por inisiá su pedido.

Delivery grátis: Pizza Hut su servisio di ‘delivery’ lo ta grátis den barionan den serkania di Pizza Hut Saliña i Sta. Maria. Klientenan por hasi pedido for di 11’or di mèrdia pa 6’or di atardi, i lo hasi entrega te ku 7’or di anochi. Keda kas! Pidi bo pizza ku ‘delivery’ grátis! *Pedido na balor di mínimo 25 florin. Pa mas informashon, tokante kon Pizza Hut ta atendé ku medidanan di prevenshon den e trayekto di COVID19, i pa promoshon i produktonan por bishitá e página di Facebook https://www.facebook.com/PizzaHutCuracao/