St. Maarten, 27 Yüli 2021 – NAGICO Insurances, e kompania di seguro privá mas grandi den Karibe ta kontentu di por anunsiá ku a yega na un akuerdo definitivo pa Peak Reinsurance Company Limited (“Peak Re”) bira 100% propietario unabes ku aprobashonnan regulatorio i otro kondishonnan ya kustumbrá keda risibí.

Desde e invershon inisial di Peak Re na Ougùstùs 2016, NAGICO Insurances a buska oportunidatnan di kresementu i a ekspandé su portafolio di seguro di bida den region Ost di karibe, i pa loke ta seguronan general e’la keda prueba su mes komo un grupo fuerte, konfiabel i sólido pagando kasi $1 bion den ‘claims’ komo konsekuensia di horkan(nan) kategoria 5: Irma, Maria i Dorian ku tabata devastador pa e region.

Maneho i hunta di NAGICO Insurances ta entusiasmá ku e desaroyo. “E perspektiva pa NAGICO Insurances ta hopi positivo”, según Kyria Ali, CEO interino i Chief Strategy & Development Officer. “Unabes e transakshon keda kompletá, NAGICO lo ta un supsidiario di un re-aseguradó global ku aproksimadamente $1.5 bion na kapital i ku kalifikashon di A.M. Best A- and Moody’s A3. Esaki lo fortalesé nos perfil aún mas i amplia nos alkanse. Adishonalmente, ta e deseo mutuo di probechá e poder di teknologia i brinda un servisio eksepshonal na nos klientenan, tur esaki den korto plaso”.

Tantu NAGICO Insurances i Peak Re lo konsentrá awor na garantisá ku ta kumpli ku tur e rekisitonan nesesario pa aprobashon regulatorio i e kondishonnan di e akuerdo.