Willemstad –Stichting Passionistas ta organisá un edishon di Pasku di e Passionistas Pop-Up Fair. E feria ta tuma lugá riba dia 5 di desèmber di 13:00 pa 18:00. E evento pa henter famia lo ta na ariba na Marshe Nobo den Punda.

Durante e Passionistas Pop-Up Fair lo tin diferente produktonan artesano, obra di man, kuminda i kos di bebe trahá dor di empresarionan i hòbiista. Bishitantenan di e feria por disfrutá di muzik di Mitch Devtiq ora nan ta hasiendo kompras. Pa e edishon aki lo tin diferente artíkulonan di Pasku i produktonan ku e tema aki manera habon den forma di un palu di Pasku.

Pa muchanan i adulto tin un workshop kreativo. Tin ‘face painting’ pa mucha i nan por traha obra di man di Pasku. Ademas adulto i muchanan por partisipá na un mini Dotten workshop. Dotten ta un téknika bunita i hopi relahante. Durante e mini workshop bo ta siña e téknika básiko di Dotten. E gastunan di e mini workshop ta Naf 15 i bo por registrá via WhatsApp +5999 5268510. Teniendo kuenta ku no por guia grupo grandi, ta rekomendabel pa registrá adelantá. Entrada di e Passionistas Pop-Up Fair  ta kompletamente grátis. Tur hende ta bon biní, pa e feria e organisashon no ta pidi QR code.