Djaweps 12 di sèptèmber e serie di pasa pelíkula mensualmente ta kuminsá ku e tragikomedia di Woody Allen titulá: Blue Jasmine den teater The Cinemas den preparashon di e di 3 edishon di Curaçao International Film Festival Rotterdam, ku lo tuma lugá di dia 2 te ku dia 6 di aprel 2014. Ku Blue Jasmine, direktor Allen, despues di su ekskurshonnan fílmiko na Europa (entre otro Vicky Cristina Barcelona, Midnight in Paris, To Rome with Love), ta bèk riba teritorio merikano. E biaha akí no tantu den su tan kerido New York, sino na San Francisco na kosta oksidental. Aktris Cate Blanchett ta bria komo e dama di sosiedat di New York, danki na su matrimonio ku e komersiante riku Hal (Alec Baldwin) ku ta poseé tur kos ku su alma ta angelá, te ora bin sali na kla ku Hal ta den kosnan dudoso i den un tiru ta pèrdè tur luho, atmirashon i prestigio. Jasmine ku su snobismo, ademas fuertemente troumatismá (okashoná pa shampaña i pildorá antidepresivo) ta disidí di tuma su refugio na San Francisco serka su ruman muhé mas chikitu Ginger (Sally Hawking), ku sí ta biba ku dos pia riba tera i ku ta modesto. Ginger ta purba di ahustá Jasmin su outo-imágen dor di enkurash’é pa bai en buska di su fortuna personal i su propio éksito. Sinembargo Jasmin no por kaba di kustumbrá den su medio ambiente sosial nobo.

Blue Jasmine ta drei for di dia 12 di sèptèmber tur dia den teater The Cinemas.

Debí na e enorme petishon di públiko a prolongá e di tres edishon di Curaçao IFFR ku un dia mas pa bira awor 5 dia na tur. E estreno lo ta riba dia 2 di aprel 2014 i ta klousurá e festival ku entrega di premio den kuadro di e pelíkula di kompetensha internashonal Yellow Robin Award ku un pelíkula di durashon kòrtiku Short Movies BIG Stories ku lo ta den agènda pa dia 6 di aprel 2014. Informashon i notisia adishonal tokante e kompetensianan den kuadro di e festival lo sigui pronto.