Espektativanan ta haltu pa kompetensia di biar ‘King of the Caribbean’:

WILLEMSTAD:- Preparashonnan ta kanando zetá pa ‘King of the Caribbean’ (KOTC); e kompetensia di biar ku e aña aki ta selebrando su di 10 aniversario. Dia 28 di Òktober próksimo lo tene un ‘Meet and Greet the Champ’ na Rio Lounge & Sportsbar siguí pa dos dia konsekutivo di kompetensia ku lo terminá riba dia 2 di Novèmber. Manera ta konosí KOTC lo konta ku partisipantenan di Kòrsou, Aruba, Boneiru, Sint Maarten, Trinidad & Tobago, Jamaica, Costa Rica , Venezuela i Hulanda. Entre e profeshonalnan ku lo partisipá den e kompetensia aki por hasi menshon di Huidjee See, Alejandro Carvajal i Wendy Jans. Na kaminda pa e gran kompetensia di biar Banco di Caribe ta laga lektornan deportivo sera konosí ku e profeshonalnan ku próksimamente lo ta di bishita na Kòrsou.

Huidjee See:

Huidje See yamá den mundu di biar ta Hooch, a resultá kampion mundial di 10-ball durante e final di kopa mundial na Manilla na Mei di 2011. Durante e kompetensia aki See a gana 11 pa 8 kontra e hungadó Chines Fu Jianbo. Na 2007 See a sali na di dos lugá den ‘World Straight Pool Championship’ kaminda den final e la pèrdè 171 pa 200 kontra Oliver Ortmann. E posishon di dos lugá a hasi See e promé hungadó di biar hulandes ku a gana un medaya di kampion mundial di ‘Straight Pool’. See nasé na Hulanda ku mayornan chines ta formando parti di e tim ‘Thurston’ den e ‘ProTeam League’ Hulandes.

Alejandro Carvajal:

Alejandro Carvajal kariñosamente yama The One den mundu di biar ta un di e hungadónan di biar ku a sali number 1 den region Latinoamerikano. Ademas di esaki e representante di Chile a sali kampion Panamerikano 2 aña konsekutivo den 10-ball.

Wendy Jans:

Wendy Jans ta un hungadó di biar i snooker relativamente hóben ku hopi título na su nòmber. Asina por hasi menshon ku Wendy a gana su promé kompetensia di snooker na 1998. Den mundu di biar Wendy a sá di konkistá e título máksimo 4 bes konsekutivo den e kompetensia di Ladies Tour. Na 2004 Wendy a sali kampion den kompetensia di Dutch Ladies 9-Ball Championship i na 2005 e la sali kampion di Spirit Tour Event. E kompetensia KOTC no tin mester di hopi introdukshon, ya ta e di 10 aña konsekutivo ku esaki ta tumando lugá na Kòrsou. E deporte di biar, a krese enormemente di akuerdo ku e organisadónan pues ta premirá un partisipashon rekòrt e aña aki. Banco di Caribe ta rekordá tur esnan ku ta deseá di presensia e Ten Ball Classic ku esaki lo tuma lugá entre 29 di Òktober i 2 di Novèmber próksimo na Rio Lounge & Sportsbar.